Риддер қаласында заманауи медициналық кешен салынып жатыр. Бір ауысымда 500 адам қабылдай алатын емхананың құрылысы аяқталуға жақын. Медицина мекемесі биылғы қазан айында қолданысқа берілуге тиіс, деп хабарлайды F16.kz.
Моноқалаға жұмыс сапарымен барған Шығыс Қазақстан облысының әкімі Нұрымбет Сақтағанов жергілікті жұртшылық көптен күткен нысанның құрылысын көрді. Өңір басшысының айтуынша, медициналық кешенде қажетті жабдықтардың барлығы орнатылған, қазір мамандар іске қосу және баптау жұмыстарын жүргізіп жатыр.
Бұл – Риддер үшін маңызды әлеуметтік нысандардың бірі. Қала халқы өсіп келеді, туристер легі де артқан. Сондықтан сапалы медициналық қызметке барлық адамның қол жеткізуі — басты назарда. Жаңа кешен тұрғындарды заманауи медициналық қызметтермен толық қамтамасыз етуге мүмкіндік береді, – облыс әкімі.
Мемлекет басшысының тапсырмасы бойынша биыл құрылыс жұмыстарын аяқтауға қайтарылған активтер есебінен 15 млрд теңге бөлінді. Ал келер жылы көпсалалы аурухана кешенінің құрамында 200 орындық стационар жұмысын бастайды.
Медициналық кадрлардың кәсіби дамуына ерекше көңіл бөлінген. Ғимаратта дәрігерлерге арналған семинарлар мен тұрғындармен профилактикалық кездесулер өтетін акт залы бар.
