Өскеменде Риддер қаласының бұрынғы әкімі Дәулет Батырбаевқа қатысты үкім шықты, деп хабарлайды F16.kz.
Қалалық №2 сотта Шығыс Қазақстан облысының «Мемлекеттік-жекеменшік серіктестік өңірлік орталығы» АҚ-ның бұрынғы басқарма төрағасы мен аталған акционерлік қоғамның жұмыс тобының екі қызметкеріне қатысты қылмыстық іс қаралды.
Соттың мәліметінше, «ШҚО МЖС өңірлік орталығы» АҚ басқарма төрағасы Дәулет Батырбаев жұмыс тобының жетекшісі Х-тің көмегімен техникалық сипаттамаға сай келмейтін шамдарды қабылдап, төлем жүргізу арқылы мемлекетке 2 266 707 000 теңге көлемінде залал келтірген.
Бұған қоса Б., Х. және жұмыс тобының қызметкері П. 2023 жылғы 6 сәуір мен 25 шілде аралығында жалған аралық актілерге қол қою арқылы 122 883 000 теңге жымқырған. Сондай-ақ 2022 жылғы 2 қыркүйек пен 12 желтоқсан аралығында мердігермен келісімшартқа заңсыз қосымша келісім жасасып, жұмыстардың (тауарлар мен қызметтердің) құнын негізсіз көтеру арқылы Б. мердігерге 206 003 200 теңгені артық бағамен аударған, – деп мәлімдеді сотта.
Айыпталушылар өз кінәсін мойындамағанымен сот оларды кінәлі деп тапты. Нәтижесінде Дәулет Батырбаев пен Х. 8 жылға бас бостандығынан айырылды, ал П. 7 жылға сотталды.
Үкім заңды күшіне енген жоқ.
Айта кетейік, Дәулет Батырбаев былтыр жазында ұсталған. Оған дейін Риддер қаласының әкімі қызметінен кеткен.
