Риддер қалалық сотында бөтеннің көлігін ломбардқа өткізіп, жеңіл жолмен пайда тапқан азаматқа қатысты қылмыстық іс қаралды, деп хабарлайды F16.kz.
Сот материалынан анықталғандай, Риддер тұрғыны әртүрлі тауарларды (жүйелік блок, көліктер) бөліп төлеу арқылы сатып аламын деген хабарландыру жариялаған. Бастапқыда аз мөлшерде төлем жасағаннан кейін ол сатушылармен байланысты үзген. Ал «сатып алған» мүлкін ломбардқа немесе металл қабылдау орнына өткізіп, түскен ақшаны жеке қажетіне жаратқан.
Сөйтіп сотталушы жәбірленушілерге айтарлықтай материалдық шығын келтірді, — деп хабарлады Шығыс Қазақстан облыстық сотының баспасөз қызметі.
Сот үкімімен ер адамға бостандығын шектеу жазасы тағайындалды. Бірақ Қазақстан Республикасы Конституциясының 30 жылдығына орай жарияланған рақымшылық туралы заңға сәйкес, жазаның мерзімі үш жыл жеті ай алты күнге дейін қысқартылды.
Үкім әлі заңды күшіне енген жоқ.
