Шығыста күннің күрт жылынуы тұрғындарға қолайсыздық туғызып жатыр. Көктайғақта көліктер мен жаяу адамдардың жүруі қиындады. Көпқабатты үйлердің шатырынан мұз құлап, қауіп төндіре бастады. Осындай оқыс оқиға Риддер шәрінде болып, қария зардап шекті, деп хабарлайды F16.kz.
Тәуелсіздік даңғылы 12 мекенжайында орналасқан көпқабатты тұрғын үйдің шатырынан төмен сырғыған қар мен мұз тротуармен кетіп бара жатқан 76 жастағы кейуананың төбесіне құлаған. Мұны терезеден көрген куәгерлер дереу жедел жәрдем шақырған.
Шығыс Қазақстан облыстық денсаулық сақтау басқармасы баспасөз қызметінің мәліметінше, зардап шеккен әйел Риддер қалалық ауруханасының травматология бөліміне жатқызылды. Дәрігерлердің айтуынша, қария жабық бас-ми жарақатын алған, сондай-ақ миы шайқалған, қабырғалары, оң иық буыны мен бел омыртқа бөлігіне зақым келген.
Жаңа ғана әйел адамның үстіне мұз құлады. Жәдел жәрдем шақырдым. Бұл мәселемен біреулер айналыса ма? Балалармен сыртқа шығуға қорқамыз. Төбеден мұз құлап кетуі мүмкін, – деді оқыс жағдай туралы видео таратқан риддерлік әлеуметтік желі қолданушысы,
Айта кетейік, шатырынан мұз құлаған үй қаланың адам көп жүретін бөлігінде орналасқан. Төменгі қабатында дүкендер жұмыс істейді.
Қала әкімдігі шатырды тазалау үшін техника жіберіп, тротуардағы мұзды алып тастауға уәде берді. Сонымен қатар тұрғын және тұрғын емес үй-жайларды күтіп ұстау меншік иелерінің міндеті екені ескертілді.
