Риддер қаласында мотоцикл мінген бірнеше адамды ұстамақ болған полиция қызметкері өзі жол ережесін бұзды. Тәртіп сақшысы олардың бірін қызметтік көлігімен қағып кетті, деп хабарлайды F16.kz.
Екінші ауданға барар жолда полиция көлігі тұтас жолақты кесіп өтіп қарсы бағытқа шығып, үш байкердің бірін қағып кеткен. Мұны әлеуметтік желіде тараған бейнежазбадан көруге болады. Шығыс Қазақстан облысы полиция департаментінің мәлімдеуінше, бетпе-бет соғылған көліктердің жылдамдығы жоғары болмағандықтан мотоциклдегі адам зардап шекпеген.
Биылғы 16 тамызда Риддер қаласында учаскелік полиция инспекторы қызметтік автокөлікпен жол ережесін бұзған мотоцикл жүргізушілерін тоқтатуға әрекет еткен. Алайда көлік тізгініне ие бола алмай, олардың бірімен соқтығысқан, – деп хабарлады облыстық полиция департаменті.
Жол-көлік оқиғасы салдарынан ешкім зардап шеккен жоқ. Мотоцикл жүргізушілері жүргізуші куәлігінсіз көлік басқарғаны және маневр жасау ережелерін бұзғаны үшін әкімшілік жауапкершілікке тартылды.
Полицей де жол қозғалысы ережелерін бұзғаны үшін жауапқа тартылды. Оның әрекеттерінің заңдылығы мен негізділігін анықтау мақсатында қызметтік тексеріс тағайындалды.
