Риддер қаласындағы теміржол вокзалы күрделі жөндеуден кейін пайдалануға берілді. Жаңартылған нысанға Шығыс Қазақстан облысының әкімі Нұрымбет Сақтағанов барып, атқарылған жұмыстардың нәтижесімен танысты, деп хабарлайды F16.kz сайты.
Сексен жылдан астам тарихы бар вокзал ғимараты толық жаңғыртылып, заманауи талаптарға сай қайта жабдықталған. Жөндеу барысында ғимараттың ішкі бөлмелері мен инженерлік желілері толық жаңартылып, жолаушыларға қолайлы жағдай жасалды. Сондай-ақ мүмкіндігі шектеулі азаматтардың кедергісіз қатынауына арналған инфрақұрылым қарастырылды.
Бүгінде Риддер теміржол вокзалы өңірдегі маңызды көлік нысандарының бірі саналады. Вокзал арқылы күн сайын ондаған жолаушы қатынайды. Осы жерден тұрғындар аптасына төрт рет Өскемен қаласына, сондай-ақ аптасына бір рет Ресейдің Новосібір және Томск қалаларына жолға шығады.
Өңір басшысы Нұрымбет Сақтағанов көлік инфрақұрылымын жаңғырту тұрғындардың өмір сүру сапасын арттырудағы маңызды бағыттардың бірі екенін атап өтті.
– Көлік инфрақұрылымын жаңғырту – ең алдымен халықтың өмір сүру сапасына салынған инвестиция. Мемлекет басшысы Қасым-Жомарт Тоқаев теміржол саласын дамытуға әрдайым ерекше көңіл бөліп келеді. Заманауи вокзалдар қауіпсіз, қолайлы әрі бүгінгі күннің талаптарына толық сай болуы тиіс, – деді облыс әкімі.
Жаңартылған вокзал Риддер қаласының көлік қолжетімділігін арттырумен қатар, өңірге келетін қонақтар үшін де жайлы әрі заманауи инфрақұрылым қалыптастыруға мүмкіндік береді. Сонымен қатар вокзал қаланың маңызды сәулет нысандарының бірі ретінде өзінің тарихи келбетін сақтай отырып, жаңа тыныс алды.
