Шығыс Қазақстан облысында жергілікті екі азамат джип-турға шыққан 15 туристі құтқарды, деп хабарлайды F16.kz.
ОҚИҒАНЫҢ МӘН-ЖАЙЫ
Жол талғамайтын төрт көлікке мінген саяхатшылар Риддер қаласына жақын маңдағы Журавлиха өзенінен өтіп, табиғат аясында демалған. Кешкісін қайтар жолда олар өзеннен өте алмай әуре-сарсаңға түсті. Таңертең ғана тынып жатқан өзен суы жаңбырдан кейін арнасынан асып, өткел бермей тасыды. Осы кезде риддерлік Александр Бердюгин мен Иван Васильев кездеседі. Олардың бірі жүк көлігін тізгіндесе, екіншісі трактормен келе жатқан. Демалушылар көмек сұрайды. Сөйтіп құтқару операциясы басталды. Жол талғамайтын көліктер бір-біріне тіркеліп, оларды «Урал» мәшіинесі сүйреді. Саяхатшылардың ішінде балалар да болған. Қауіпсіздік үшін олар жүк көлігіне отырғызылады. Операция оңайға соққан жоқ. Тіркемедегі көліктің бірі, дәлірек айтқанда Toyota Prado машинасы арыны қатты өзеннің ағысына шыдамай аударылып қалды.
Prado аударылғанда көліктерді тіркеуден шешіп баруға тура келді. Соңғы джип те ажыратылып қалды. Оның жүргізушісі: «Мен көлікті бүлдірмеймін, жағада қалдырамын» деді. Мен «Уралды» өзеннің арғы бетіне көлденең қойдым, өйткені су қатты, джипке жақындау мүмкін болмады. Ақыры Prado-ны тұрғыздық, – деді Александр Бердюгин.
БЕС САҒАТҚА СОЗЫЛҒАН ОПЕРАЦИЯ
Сөйтіп риддерлік екі азамат су «тұтқынында» қалған 15 адамды құтқарды. Бердюгин үш көлікті өзеннен сүйреп өткізді, адамдарды түгел алып шықты. Ал төртінші мәшін Журавлиха жағасында қалды. Құтқару операциясы бес сағаттан астам уақытқа созылды.
