Бүгін Өскеменде «Рухты теңдік» инклюзивті фестивалі өтіп, үздіктер марапатталды. Салтанатты шараға аймақ басшысы Нұрымбет Сақтағанов қатысты, деп хабарлайды F16.kz.
Өнер байқауына Өскемен қаласы, Глубокое, Шемонаиха, Катонқарағай, Ұлан, Тарбағатай, Күршім және Үлкен Нарын аудандарынан шығармашылық ұжымдар мен жеке орындаушылар қатысты.
Облыстық филармонияның фойесінде қатысушылар жасаған түрлі қолөнер бұйымдар, суреттер қойылған көрме ұйымдастырылды. Көпшілік қауым алдымен көрмені тамашалап, содан кейін ерекше жандардың концертіне ден қойды. Сахнада ән әуелеп, күй күмбірледі, авторлық өлеңдер оқылды.
Баға жетпес мәдени мұрамызды зерттеу, сақтау, насихаттау және молайту — бәрімізге ортақ әрі аса маңызды міндет. Әсіресе ерекше қажеттілігі бар талантты да шығармашыл жандардың өнері, еңбегі мен ерік-жігері айналасындағыларға шабыт беріп, мәдениеттің дамуына елеулі үлес қосып отырғанын ерекше атап өткім келеді. Барлық қатысушыға толағай табыс, жаңа жетістіктер, шалқар шабыт пен өз күштеріңізге деген сенім тілеймін, – деді аймақ басшысы.
Фестиваль қорытындысы бойынша вокал аталымында Айболат Құнапиев (Күршім ауданы) жеңімпаз атанса, аспаппен өнер көрсетуде құрамында Радмир Видахмет, Саянат Асарова, Досым Кенжебек және Айдын Мұхамеджанов бар ансамбль (Өскемен қаласы) үздік деп танылды. Авторлық шығармашылық аталымында Татьяна Медведева (Өскемен қаласы), бейнелеу өнерінде Станислав Савинов (Өскемен қаласы) қолданбалы өнерде Зульфира Ерқасымова (Үлкен Нарын ауданы) жеңімпаз болды. Басқа қатысушыларға да алғыс хаттар мен демеушілер атынан қаржылай сыйлықтар берілді.
