Былтырғы 10 айда Шығыс Қазақстан облысында 35 сәби өлімі тіркелсе, биыл бұл көрсеткіш 47-ге өскен. Бұл туралы облыстық мәслихат сессиясында ШҚО денсаулық сақтау басқармасының басшысы Төлеген Жігітаев мәлім етті, деп хабарлайды F16.kz.
Жыл басынан бері өңірде 6 296 сәби дүниеге келген.
Өлім-жітімнің негізгі себептері: перинатальды кезеңде пайда болатын жағдайлар, туабітті даму ақаулары және тыныс алу органдарының аурулары. Бұдан бөлек, 10 айда 25 неонатальды өлім жағдайы тіркелсе, былтыр 19 факті анықталды, – деді басқарма басшысы.
Өңірде психоактивті заттарды тұтыну салдарынан психикалық және мінез-құлық бұзылыстарының аурушаңдығы 37,8%-ға төмендеді. Аймақта АИТВ жұқтыру жағдайы 0,33-ке, B гепатитімен ауыру жағдайы 0,14-ке тең. Қатерлі ісіктердің 36,3%-ы 0–I сатысында анықталады. Ал туберкулездің аурушаңдығы 110,1%-ға төмендеген.
