Шығыс Қазақстан облысының Шыңғыстай ауылы маңында сағатына 80 тоннаға дейін өнім шығаратын жаңа асфальт зауыты өз жұмысын бастады, деп хабарлайды F16.kz.
Бұл нысанның іске қосылуын шалғайда жатқан Катонқарағай ауданында жол-көлік инфрақұрылымын жақсартуға бағытталған маңызды қадамдардың бірі деуге әбден болады. Шекаралық аймақта қолға алынған жобаға 280 миллион теңге көлемінде жеке инвестиция тартылып, заманауи өндірістік алаң ашылып қана қоймай, жергілікті тұрғындарға 10 тұрақты жұмыс орны құрылды. Зауыттың негізгі жабдықтары мен құрылыс материалдары Қытайдан жеткізілген.
Жергілікті биліктің айтуынша, бұл зауыт – жай ғана өндіріс орны емес, таулық өңірдің тұрғындарын сапалы жолмен қамтамасыз етілуіне серпін беретін стратегиялық маңызы бар нысан. Жақын арада Берел, Аршаты, Барлық және Ақсу бағыттарында асфальт төсеу жұмыстары басталмақ.
Аудан көлемінде асфальт өндірісінің жолға қойылуы логистикалық шығындарды едәуір азайтып, әсіресе күрделі географиялық жағдайларда құрылыс қарқынын арттыруға мүмкіндік береді. Бұған дейін құрылыс материалдарын жеткізу бірнеше аптаға созылатын.
Катонқарағай ауданы тұмса табиғатымен ерекшеленетін өңірлердің бірі. Төр Алтайдың қойнауындағы таулы өлкеде көлік қатынасын дамыту да өзекті мәселе. Осы тұрғыда жаңа зауыттың іске қосылуын өңір инфрақұрылымын дамытуға бағытталған жүйелі жұмыстың бір бөлігі ретінде қарастыруға болады. Жолдың сапалы болуы тек жайлылық емес, сонымен бірге туризмді, сауданы және халықтың мобильдігін қамтамасыз етуге мүмкіндік береді.
Аймақта жүріп жатқан жаңғырту жұмыстары мен инвестициялық тартымдылықты арттыруға бағытталған саясат аясында мұндай жобалар мемлекеттік-жекеменшік серіктестік пен ресурстарды тиімді басқарудың жарқын үлгісіне айналды. Нәтижесінде, нақты жобалар арқылы тұтас өңірлердің келбеті өзгеріп келеді.
