Шығыс Қазақстан облыстық драма және оперетта театрында «Үміт нұры» атты театрландырылған концерттік бағдарлама көрсетілді. Қойылымға психоневрологиялық аурулары бар, 18 жастан асқан мүгедектігі бар адамдар да қатысты. Шара ерекше жандардың шығармашылыққа деген құштарлығын, өнер жолындағы талпынысын көрсету мақсатында өткізілді, деп хабарлайды F16.kz.
Шараны облыстық жұмыспен қамту және әлеуметтік бағдарламаларды үйлестіру, мәдениет басқармаларының қолдауымен Риддер қаласының арнайы әлеуметтік қызмет көрсету орталығы ұйымдастырды.
Концертте театр, хореография және вокалдық өнер жанрлары ерекше үйлесім тапқан. Сюжет көрерменге әртістерді түсінуге, оларға жанашыр болуға және олардың жаңа жетістіктеріне бірге қуануға мүмкіндік береді.
Қазір халық арасында осындай орталықтардағы адамдарға күн көрсетпейді, ұрып-соғады деген сынды қауесет көп. Бұл сөздерді жоққа шығару үшін халыққа осы қойылымды ұсындық. Қойылымға екі ай дайындалдық. Әркім өз қалауымен қатысты. Ақыл-есінде ауытқу бар адамдармен жұмыс істеу өте қиын. Соған қарамастан біздің қызметкерлер барын салды, – деді Риддер қаласының арнайы әлеуметтік қызмет көрсету орталығы директоры Еркін Аусанұлы.
Аталған орталықта 440-қа жуық қызметкер бар. Мұнда психоневрологиялық аурулары бар 720 адам тұрады. Олар бос уақытында шығармашылық жұмыстарымен, спортпен, қолөнер бұйымдарын жасаумен айналысады. Қойылымға келушілерге осы бұйымдардан көрме де ұсынылды.
Концерт соңындағы зал толы көрерменнің шапалағы шараның ерекше өткізілгенін дәлелдеді.
Дана Әбдікәрім
