«Маңызды әлеуметтік нысандарды «сақалды» құрылысқа айналдыратын компанияларды жауапқа тарту қажет!» Шығыс Қазақстан облысының әкімі Нұрымбет Сақтағанов «Ауылда денсаулық сақтауды жаңғырту» ұлттық жобасының өңірдегі жүзеге асырылу барысы талқыланған жиында осылай деді.
Шығыс Қазақстан облысы әкімі баспасөз қызметінің хабарлауынша, өңірде «Ауылда денсаулық сақтауды жаңғырту» ұлттық жобасы жүйелі жүзеге асырылып жатыр. Бүгінге дейін жоспарланған 36 медициналық нысанның 35-нің құрылысы аяқталды. Оның ішінде 34 дәрігерлік пункт пайдалануға беріліп, 27 нысан денсаулық сақтау басқармасының есебіне өтті. Айта кетерлігі, жаңадан бой көтерген мекемелердің 16-сы лицензия алып, азаматтарды қабылдай бастады. Дегенмен құрылысы аяқталмағандар да бар.
Мәселен, Түркістан облысының «Construction Group Samruk» компаниясы Волчанка, Тұрғысын ауылында және өңірдің өзге де бірқатар елді мекенінде нысандар салуға мемлекеттік сатып алу конкурсын жеңіп алған. Алайда өз міндеттерін орындаудың орнына, құрылыс мерзімін кешіктіріп, сапасыз жұмыс атқарғаны тіркелді. Облыстық құрылыс, сәулет және қала құрылысы басқармасының басшысы Руфат Акрамов атап өткендей, Астанада орналасқан компанияның кеңсесі шағымдарға жауап бермейді, тіпті мүлдем байланысқа шықпайды. Сондықтан жосықсыз мердігерді жауапқа тарту үшін сотқа тиісті құжаттар дайындалып жатыр. Бұл «Construction Group Samruk» компаниясынмен болған өңірдегі алғашқы жағдайы емес, олар бұрын спорт нысандарын салу кезінде міндеттемелерді орындамаған.
Жауапты органдардың араласуынан кейін Волчанка және Тұрғысын ауылдарындағы құрылыс қайта жанданды, қосалқы мердігер тартылды, ішкі әрлеу, жабдықтарды орнату және аумақты абаттандыру аяқталуға жақын. Басқарманың мәліметінше, Волчанка ауылындағы құны 419,4 млн теңге болатын жобаның 290 млн теңгесі игерілді. Нысанды толық аяқтау үшін тағы 127,8 млн теңге қажет. Ұлттық жоба аясында салынып жатқан екі мекемені осы жылдың қыркүйек айында тапсыру жоспарланған.
Маңызды әлеуметтік нысандарды «сақалды құрылысқа» айналдыратын компанияларды жауапқа тарту қажет. Ауыл халқы үшін аса қажет медициналық нысандардың құрылысы кешіктірілмеу керек. Бұл үшін қала, аудан әкімдері тікелей жауапты. Өз міндеттемелерін орындай алмайтын компаниялардың мемлекеттік сатып алу конкурстарын жеңіп алу тәжірибесін жою қажет. Өйткені бұл тұрғындардың сенімін жоғалтып қана қоймай, өңірдегі инфрақұрылымның дамуына кедергі келтіреді, — деді облыс әкімі Нұрымбет Сақтағанов.
Қазір Майемер, Барлық, Тройницкое ауылдарындағы медициналық пункттерде анықталған кемшіліктерді жою жұмысы жүргізіліп, құрылысты аяқтау мерзімі және әр нысанға жауапты мамандар бекітілген.
