Заң үстемдік құрған мемлекетте жемқорлыққа жол жоқ. Бұл туралы аймақ басшысы Нұрымбет Сақтағанов бүгін өткен Шығыс Қазақстан облысы мәслихатының кезекті сессиясында айтты, деп хабарлайды F16.kz.
Мемлекет басшысы Қасым-Жомарт Кемелұлы Тоқаев «Заң мен тәртіп – мемлекетіміздің мызғымас тұғыры» деп әрдайым айтып келеді. Бұл – қоғамдағы тұрақтылықтың, азаматтардың құқықтары мен қауіпсіздігінің, еліміздің даму бағытының негізі. Осы қағидатты басшылыққа ала отырып, біз сіздермен бірге әрбір бастамада заңның үстемдігін қамтамасыз етуге, қоғамдық тәртіпті нығайтуға және азаматтардың мемлекеттік институттарға деген сенімін арттыруға міндеттіміз.
Кез келген фактілерді мұқият қарап, құзырлы органдарға жолдайтын боламыз. Кеше болған жағдай – біздің жемқорлыққа қарсы ұстанымның дәлелі, – деп атап өтті облыс әкімі.
Бұған дейін жазғанымыздай, кеше облыстың жолаушы көлігі және автомобиль жолдары басқармасының бұрынғы басшысы Данияр Уахитов өз өтінішімен қызметінен босатылған. Оған себеп құзырлы органдар жүргізген сыбайлас жемқорлық тәуекелдерін жоюға бағытталған кешенді тексерулер нәтижесінде Уахитовтың заңға қайшы әрекеттерінің анықталуы болды.
