Самар ауданының тұрғындарымен болған есептік кездесуде Шығыс Қазақстан облысының әкімі Нұрымбет Сақтағанов Палатцы-Подгорное ауылдарының арасын жалғайтын автожол учаскесінде ағымдағы жөндеу толық аяқталғанын жеткізді, деп хабарлайды F16.kz аудан әкімінің баспасөз қызметіне сілтеме жасап.
Биыл мамырда аймақ басшысы үш бірдей Кеңес Одағының батыры дүниеге келген Подгорное ауылына жұмыс сапарымен барып, тұрғындармен кездескен. Сол кезде жергілікті жұрт жолдың сапасыздығына шағымданған. Қырық жылдан астам уақыттан бері жөндеу жүргізілмеген жол учаскесі көктемде қар ерігенде су жырып, ауылдар негізгі трассадан уақытша оқшауланып қалатын. Кездесу барысында тұрғындар: Сіз – біздің ауылға автокөлікпен келген алғашқы облыс әкімісіз. Мәселе оң шешімін табады деп сенеміз, – деген еді.
Өңір басшысы жолдың нақты жағдайымен танысып, аудан басшылығына нақты тапсырма берген. Жөндеу жұмысы белгіленген мерзімде әрі сапалы жүргізіліп, жол нормативтік талаптарға сәйкес жағдайға келтірілді. Нәтижесінде көлік қозғалысының қауіпсіздігі мен тұрғындар үшін қолайлы қатынас қамтамасыз етілді. Ауыл халқы азаматтардың өтінішіне жедел назар аударып, оң нәтиже шығарған облыс басшылығына шынайы ризашылық білдірді.
Жалпы, Самар ауданында жол-көлік инфрақұрылымын дамытуға бағытталған жұмыстар жүйелі түрде жүзеге асырылып келеді. Былтыр ауданда 45 шақырым автожол мен елді мекен көшелері жөнделсе, биыл 60 шақырымнан астам жолдың жөндеу жұмыстары аяқталды.
