Шығыс Қазақстан облысының Миролюбовка ауылында жаңа фельдшерлік-амбулаториялық пункт ашылды. Заманауи медицина нысаны «Ауылдық денсаулық сақтауды жаңғырту» жобасы аясында бой көтеріп, халықтың алғашқы медицинадық-санитариялық көмекке еркін қол жеткізуіне мүмкіндік туғызып отыр, деп хабарлайды F16.kz порталы аудан әкімінің баспасөз қызметіне сілтеме жасап.
Жергілікті тұрғындардың айтуынша, Миролюбовка ауылында ұзақ жылдар бойы жаңа әлеуметтік нысандар салынбаған, кейінгі ғимараттар 1990-жылдары тұрғызылған. Осыған байланысты жаңа медицина пунктінің ашылуы ауыл халқы үшін көптен күткен маңызды оқиға болғаны рас.
Салтанатты шара барысында Самар ауданының әкімі Серік Жеңісов нысанның құрылысы туралы шешім былтыр облыс әкімі Нұрымбет Сақтағановтың ауданға жасаған сапары кезінде қабылданғанын атап өтті.
Миролюбовка — транзиттік ауыл және туристік бағытта орналасқан елді мекен. Осыны ескере отырып, фельдшерлік-амбулаториялық пунктті дәл осы ауылда салу жөнінде шешім қабылданды. Облыс басшылығының қолдауының нәтижесінде бұл мәселе оң шешім тауып, бүгінде ауыл тұрғындары мен аудан қонақтары заманауи жағдайда сапалы медициналық қызмет ала алады, — деді аудан әкімі.
Сонымен қатар ол ауылдық жерде медицина инфрақұрылымын дамыту Мемлекет басшысы Қасым-Жомарт Тоқаевтың азаматтардың өмір сүру сапасын арттыруға және тұрғылықты жеріне қарамастан медициналық көмекке тең қолжетімділікті қамтамасыз етуге бағытталған әлеуметтік саясатына толық сәйкес келетінін атап өтті.
Медицина саласының ардагері, Миролюбовка ауылының тұрғыны Фания Арапова жаңадан ашылған нысан халықтың денсаулығын нығайтуға зор ықпал ететінін тілге тиек етті.
Ауылымызда осындай маңызды нысанның ашылғанына өте қуаныштымын. Мен Миролюбовкада медицина саласында 30 жылдан астам еңбек еттім. Бұл ФАП-тың салынуы — облыс пен аудан басшылығының көреген әрі уақытылы қабылдаған шешімі. Қазіргі медицина үнемі дамып келеді, ал бұл жерде халыққа сапалы қызмет көрсетуге қажетті барлық заманауи жабдықтар бар, — деді ол.
Жаңа фельдшерлік-амбулаториялық пункт заманауи медициналық құрал-жабдықтармен, емшара және қарау кабинеттерімен, сондай-ақ дәріханалық бөлмемен қамтамасыз етілген. Ғимарат санитариялық және құрылыс талаптарына толық сәйкес келеді, барлық инженерлік желілерге қосылған және мүмкіндігі шектеулі азаматтарға бейімделген. Нысанның жалпы аумағы 139 шаршы метрді құрайды, бір мезетте 25 адамға дейін қабылдауға мүмкіндік бар.
