Шығыс Қазақстан облысының Самар ауылында электрмен жабдықтау жүйесін жаңғыртуға бағытталған маңызды қадам жасалды. Инвестициялық бағдарлама аясында ауылдағы электр қосалқы станциясы толық жаңартылып, заманауи техникалық талаптарға сай жабдықтармен қамтамасыз етілді, деп хабарлайды F16.kz.
Бұл жаңғырту жұмыстары өңірдің энергетикалық қауіпсіздігін арттырып, тұтынушыларды электр қуатымен тұрақты әрі үздіксіз қамтамасыз етуге мүмкіндік береді.
Самар ауданы әкімдігі баспасөз қызметінің мәліметінше, қосалқы станцияда бұрын пайдаланылған ескі жабдықтар ауыстырылып, олардың орнына сенімді, энергия үнемдеуге қолайлы жаңа қондырғылар орнатылды. Бұл өз кезегінде электр желілерінде болатын апатты жағдайлардың алдын алып, техникалық ақаулардың азаюына ықпал етеді.
Көкпекті АЭЖ Самар желілік учаскесінің және «БЭСК» АҚ басшысы Алмас Лұқпановтың айтуынша, аталған жаңғырту жұмыстары ауданнда электр энергиясын жеткізу сапасын едәуір жақсартады.
Жаңартылған қосалқы станция жүктемені тиімді бөліп, тұтынушыларды тұрақты электр қуатымен қамтамасыз етуге мүмкіндік береді. Бұл әсіресе қыс мезгілінде және өндірістік нысандардың жүктемесі артқан кезеңдерде маңызды, – дейді сала мамандары.
Жаңғырту аясында қосалқы станция толық жабық типке көшірілді. Бұл шешім техникалық тұрғыдан ғана емес, қауіпсіздік мәселесінде де өзекті. Жабық типтегі станция электрмонтерлер үшін қауіпсіз әрі ыңғайлы еңбек жағдайын қамтамасыз етіп, қолайсыз ауа райынан жабдықтарды қорғауға мүмкіндік береді. Сонымен қатар бұл қызмет көрсету сапасын арттырып, жөндеу жұмыстарын тиімді ұйымдастыруға жол ашады.
Сарапшылардың пікірінше, электр инфрақұрылымын жаңарту – ауылдардың әлеуметтік-экономикалық дамуының негізгі факторларының бірі. Тұрақты электр энергиясы білім беру, денсаулық сақтау, кәсіпкерлік және тұрмыстық қызметтердің үздіксіз жұмыс істеуіне тікелей әсер етеді. Осы тұрғыдан алғанда, Самар ауылындағы қосалқы станцияның жаңғыртылуы жергілікті тұрғындардың өмір сүру сапасын арттыруға бағытталған стратегиялық маңызы бар жоба деп айтуға болады.
2026 жылы аудан аумағында электрмен жабдықтау желілерін ішінара жаңғырту жоспарланып отыр. Алдағы жобалар тозығы жеткен желілерді ауыстырып, энергия шығынын азайтуға және электрмен қамту жүйесінің сенімділігін одан әрі күшейтуге бағытталмақ.
