ҚР Мемлекет басшысының тапсырмасы бойынша өңірде 2022 жылдан бері пайдаланылмайтын жер телімдерін мемлекет меншігіне қайтару жұмыстары жүріп жатыр. Жыл басынан бері өңірде 80 мың гектар жер мемлекетке қайтарылған, деп хабарлайды F16.kz.
Облыстық жер қатынастары басқарма басшысының мәліметіне сүйенсек, жостар бойынша жыл көлемінде 120 мың гектар жер қайтарылуы тиіс. Бүгінде оның 67%-ы орындалған.
Ең төменгі көрсеткіш Самар мен Марқакөл аудандарында. Самарда белгіленген норманың тек 10%-ы орындалса, Марқакөл ауданы 9 айда 4 мың гектар жерді мемлекет меншігіне қайтарып, 33% орындады. Жалпы облыста жерді қайтару бойынша оң динамика байқалады, алайда жоспарлы көрсеткіштерден артта қалуға жол берген аудандар осы бағыттағы жұмысты күшейтуі қажет, — деді басқарма басшысы Надежда Михейлис бүгінгі әкімдік отырысында.
Айта кету керек, ҚР Заңнамасына енгізілген өзгерістерге байланысты былтырдан бастап халыққа мал жаюға арналған жер учаскелері берілмейді. Тұрғындар енді жайылымға арналған жерді Жайылымдарды басқару жөніндегі жоспарларға сәйкес қана пайдалана алады.
Жоспарлардың болмауы халықтың малын бейберекет және заңсыз жаюына әкеп соғады. Сонымен қатар, жайылым айналымын сақтамау жердің деградациясына алып келеді, — деді басқарама басшысы.
Мемлекет басшысы Қазақстан халқына Жолдауында 2026 жылдың ортасына дейін барлық қайтарылған ауыл шаруашылығы жерлерін тұрақты айналымға тартуды тапсырды. Бұл шара жайылым тапшылығы мәселесін де шешуге мүмкіндік береді.
Елдің дамуы мен барлық азаматтардың әл-ауқаты үшін жұмыс істеуге тиіс стратегиялық ресурс, әрине, жер болып табылады. Мен пайдаланылмаған және заңсыз алынған ауылшаруашылық жерлерін кейіннен қайта бөлумен алып қою бойынша ауқымды жұмыстарға бастамашылық жасадым. Жер иесіз қалмауы керек, жерді оның құндылығын түсінетіндерге ғана беру керек. Бұрын пайдаланылмаған ауылшаруашылық жерлері өндіріс, инвестиция және жұмыспен қамту орталықтарына айналуы керек, — деді Президент.
Облыс бойынша қайтарылған жерлерден ауыл шаруашылығы айналымына 70,6 мың га жер тартылып, 40,4 мың гектары халықтың мұқтажын қанағаттандыру үшін, 30,2 мыңы агроқұрылымдарға конкурстық негізде берілді.
Осыған байланысты қалалар мен аудандардың әкімдері 2026 жылғы 1 маусымға дейін пайдалануға жарамды барлық қайтарылған жерлерді ауыл шаруашылығы айналымына тартуы қажет.
