Республика күні қарсаңында Самар ауданының Құлынжон ауылында жаңа әлеуметтік нысан — халыққа әлеуметтік қызмет көрсету орталығы ашылды, деп хабарлайды F16.kz.
Аумақтық орталықта логопед, дефектолог, психолог, массажист және еңбек терапиясы нұсқаушысы сияқты мамандар қызмет атқарады.
Заманауи үлгіде салынған ғимараттың кабинеттері кең әрі жарық, қажетті құрал-жабдықтармен жабдықталған.
Мекеме төрт санаттағы азаматтарға қызмет көрсетеді:
- 1,5 жастан 18 жасқа дейінгі психоневрологиялық ауытқулары бар балаларға;
- 1,5 жастан 18 жасқа дейінгі тірек-қимыл аппараты бұзылған балаларға;
- 18 жастан асқан психоневрологиялық сырқаты бар ересектерге;
- I және II топтағы мүгедектігі бар жандарға.
Орталықтың басты мақсаты – балалардың қоғамға бейімделуіне, жеке қабілеттерін дамытуына және отбасылық ортада толыққанды өмір сүруіне жағдай жасау.
Мекеме күндізгі тәртіпте, сағат 9.00-ден 16.00-ге дейін жұмыс істейді. Қызмет алушылардың күнделікті болу уақыты – 6 сағат.
Орталықта түзету, дамыту және қолдау бағытындағы сегіз түрлі әлеуметтік қызмет көрсетіледі. Бұл бағытта логопед-дефектолог, психолог, емдік денешынықтыру мұғалімдері, тәрбиешілер, сондай-ақ педиатр, терапевт, реабилитолог, невропатолог және психиатр сияқты жоғары білікті мамандар еңбек етеді.
Бүгінгі таңда аудан тұрғындарынан 15 өтініш қабылданды. Алдағы уақытта қызмет алушылардың қатарын 26 адамға дейін арттыру көзделіп отыр.
Жаңадан ашылған орталыққа Шығыс Қазақстан облысының әкімі Нұрымбет Сақтағанов шағын автобус тарту етті.
Самар ауданы халқының атынан аймақ басшысы Нұрымбет Аманұлына орталыққа сыйлаған жаңа автокөлік үшін алғыс айтамыз. Бұл қолдау шалғай ауылдардағы балаларды орталыққа тасымалдауды айтарлықтай жеңілдетеді. – деді аудан әкімі Серік Жеңісов.
