Самар ауылында тұрғындар көп ұзамай сапалы ауызсумен қамтамасыз етіледі. Қазіргі уақытта нысанда іске қосу-баптау жұмыстары жүргізіліп жатыр, деп хабарлайды F16.kz.
Бүгінде су құбырын іске қосуға дайындық жұмыстары қарқынды. Мамандар қажетті жұмыстарды тәулік бойы атқарып жатыр.
Бұған дейін жобаны аяқтау мерзімі жұмыс барысында анықталған техникалық мәселелерге байланысты кейінге шегерілген. Мамандар анықталған кемшіліктерді жойып, жүйе нысандарын өзара қосуға байланысты қосымша жұмыстар жүргізді, — дейді аудан әкімдігінің баспасөз қызметі.
Жүйені толық іске қосу үшін тағы 3 шақырым су құбырын тарту қажет. Жаңа учаске Самар ауылындағы жаңа су алу нысанын таза су резервуарымен жалғайды. Бұл учаскенің құрылысын қыркүйек айының соңына дейін аяқтау жоспарланып отыр.
Жобаны аяқтауға «Eiwaz» ЖШС компаниясы қолдау көрсетеді. Аудан әкімі Серік Жеңісов пен «Eiwaz» ЖШС директоры Эрнст Нұртазин ынтымақтастық туралы меморандумға қол қойды. Келісім аясында компания жетіспейтін су құбыры желілерінің учаскесін өз қаражаты есебінен ақысыз салып бермек.
Біз әрдайым Самар ауданының тұрғындарына қолдау көрсетуге дайынбыз. Бизнестің әлеуметтік жауапкершілігі аясында бұл жұмыстарды өз қаражатымыз есебінен орындау туралы шешім қабылдадық, — деді Эрнст Нұртазин.
Жұмыстар толық аяқталғаннан кейін су құбыры жүйесі біртұтас жүйеге қосылып, пайдалануға дайын болады. Осылайша, Самар ауылының тұрғындары жақын уақытта сапалы ауызсумен қамтамасыз етіледі.
«Eiwaz» ЖШС мен Самар ауданы арасындағы ынтымақтастық бұл жобамен шектелмейді. Компания алдағы уақытта да ауданмен бірлесіп жұмыс істеп, аумақты дамытуға және тұрғындарды қолдауға бағытталған перспективалы жобаларға қатысуды жоспарлап отыр.
