Өскемен ГЭС-інде «Samruk Úmiti» жобасы аясында Балалар ауылы мен «Үміт» арнаулы әлеуметтік қызметтерге мұқтаж балаларды қолдау орталығының тәрбиеленушілеріне арналған кәсіптік бағдар беру іс-шарасы өтті, деп хабарлайды F16.kz.
«Samruk Úmiti» бағдарламасы — ата-ана қамқорлығынсыз қалған балаларға түрлі мамандықтармен танысуға және болашақ оқу бағытын таңдауға бағытталған. Бағдарлама қатысушылары кәсіпорындарға барып, мамандармен кездеседі, техникалық мамандықтар туралы толыққанды ақпарат алады.
Кәсіпорын аталған жобаға екінші жыл қатысып отыр. Бұл жолы Өскемен жоғары политехникалық колледжінің оқытушылары энергетика және техникалық мамандықтар тақырыбында квест пен тәжірибелік тапсырмалар дайындады. Оқушылар топпен жұмыс істеп, инженерлік тапсырмаларды орындады, энергетик мамандығының негіздерімен және заманауи электр станциясының жұмысымен танысты, — дейді «Өскемен ГЭС» кәсіпорнының баспасөз қызметі.
Шара барысында қатысушыларға Өскемен ГЭС-і бойынша экскурсия өткізілді. Балалар машина залында болып, станцияның гидроагрегаттары және жабдықтарының жұмысын бақылады.
Қазір біз бағдарлама қатысушыларының бірін политехникалық колледжде мақсатты оқыту мүмкіндігін қарастырып жатырмыз. Оқу барысында студент станцияда тәжірибеден өтеді, ал оқуын аяқтағаннан кейін жас маман Өскемен ГЭС-іне жұмысқа тұра алады, — деді персоналмен жұмыс бөлімінің бастығы Зүлфия Боранбаева.
Жоба аясында барлық қатысушыға Өскемен жоғары политехникалық колледжінде техникалық мамандықтар бойынша тегін оқуға сертификат табысталды.
