Семейдегі Шәкәрім университетінде студенттердің салауатты өмір салтын ұстануына бағытталған тағы бір маңызды нысан жаңғыртылып, қолданысқа берілді. Оқу ордасының №1 спорт кешенінде дәстүрлі спартакиаданың салтанатты ашылуымен қатар, заман талабына сай жаңартылған жүзу бассейнінің тұсауы кесілді, деп хабарлайды F16.kz.
Студенттер қаласы атанған Семей үшін бұл спорттық нысанның маңызы зор. Бассейн білім алушы жастардың денсаулығын нығайтып, бос уақытын тиімді өткізуіне мүмкіндік береді. Нысанда барлық жағдай қарастырылған.
Спартакиаданың ашылу салтанатында сөз сөйлеген ардагер ұстаз Анатолий Сидельников спорт кешенінің тарихына тоқталды. Оның айтуынша, бұл ғимарат 46 жыл бұрын студенттер мен қала тұрғындарының бірлескен еңбегімен салынған.
1980 жылдың қыркүйегінде жүзу бассейні пайдалануға беріліп, мұнда қалалық, облыстық, республикалық, тіпті 1982 жылы Бүкілодақтық деңгейдегі жарыстар өтті. Ол кезде бұл облыстағы жалғыз денешынықтыру кешені болатын. Бүгінгі жаңартылған нұсқасын көріп, жөндеу жұмыстарының сапалы жүргізілгеніне көз жеткіздім, – деді ардагер ұстаз.
Ұзақ жылдар бойы қолданыстан шыққан бассейн 2025 жылы күрделі жөндеуден өтіп, қайта іске қосылды. Бұл жаңалық университет студенттеріне үлкен сый болды.
Жаттықтырушы Диас Әлімбекұлының айтуынша, жаңартылған бассейн студенттердің спортқа деген қызығушылығын арттыруға сеп болмақ.
Жүзу арқылы жастардың денсаулығы нығайып, түрлі деңгейдегі жарыстарға қатысуға ынтасы артады. Мұнда тек спортшы студенттер ғана емес, белгіленген кесте бойынша жүзуді үйренгісі келетін барлық жастарға мүмкіндік бар, – дейді ол.
Жалпы аумағы 25х14 метр болатын бассейн заманауи талаптарға сай жабдықталған. Мұнда температура мен су сапасы тұрақты бақылауда болады. Бассейнге студенттермен қатар оқытушылар мен ардагер ұстаздар да түсе алады.
Айта кетейік, №1 спорт кешенінде теннис, волейбол, шахмат сияқты спорт түрлерімен айналысуға да жағдай жасалған.
С. Қасымжанұлы,
Абай облысы
