Семей қаласының 66 жастағы тұрғыны учаскелік полиция пункті жанындағы екі көлікті өртеп жіберлі, деп хабарлайды F16.kz.
Бұған дейін әлеуметтік желілерде жанып жатқан полиция көліктерінің видеосы тараған еді. Куәгерлердің айтуынша, оқиға Семейдегі «Юность» шағынауданында, колледж маңында болған. Өрт қасақана қойылған деген дерек айтылды.
Абай облысының полиция департаменті оқиғаның мән-жайын хабарлады. 25 қаңтарда «Юность» шағынауданындағы әкімшілік аумақты аралау барысында учаскелік полиция инспекторлары бұрын сотталған 66 жастағы жергілікті тұрғынның қоғамдық орында мас жүргенін байқап, бөлімшеге алып барған.
Полиция мәліметінше, тұрғын қоғамдық тәртіпті бұзып, агрессивті мінез-құлық танытқан.
Ол учаскелік полиция пунктіне жеткізіліп, қоғамдық орында алкогольдік мас күйде болғаны үшін әкімшілік хаттама толтырылды. Құжаттар рәсімделгеннен кейін туыстарына тапсырылып, босатылған. Бұған келіспеген ер адам қасақана заңсыз әрекет жасап, учаскелік полиция пунктінің маңында тұрған, учаскелік инспекторларға тиесілі екі автокөлікті бензин құйып өртеп жіберген, – деп хабарлады полиция.
Өрт салдарынан ірі көлемде материалдық шығын келтірілген.
Аталған факт бойынша қылмыстық іс қозғалды. Күдікті ұсталып, уақытша ұстау изоляторына қамалған, жасаған ісін толық мойындады.
