Бүгін Сенаттың жалпы отырысында жануарларға жауапкершілікпен қарау мәселесіне арналған заң жобасы қаралып, Мәжіліске қайтарылды. Сенаторлар қоғамда үлкен резонанс тудырған бірқатар даулы норманы қайта қарап, құжатқа ізгілікке негізделген түзетулер енгізді, деп хабарлайды F16.kz порталы Сенаттың баспасөз қызметіне сілтеме жасап.
Заңды талқылау барысында сенаторлар «эвтаназия» терминін қолданудан бас тарту туралы шешім қабылдады. Бұған дейін Мәжіліс қабылдаған нұсқада панажайға түскен соң бес тәулік ішінде иесі табылмаған жануарларды жою көзделген болатын. Сенат бұл бес күндік мерзімді де алып тастап, иесіз жануарлар санын реттеудің нақты тәртібі мен мерзімін әр өңірдің мәслихаттарына дербес айқындауды ұсынды.
Сонымен қатар депутаттар «чипі жоқ иттер мен мысықтарды иесіз деп тану» туралы тұжырымға түзету енгізді. Сенаторлардың пікірінше, чиптің болмауы әрдайым жануардың иесі жоқ дегенді білдірмейді, сондықтан бұл норма үй жануарларының қате түрде иесіз деп танылуына әкеп соғуы мүмкін.
Дегенмен, заң аясында жануар иелерінің жауапкершілігі күшейтілмек. Атап айтқанда:
-
Үй жануарын серуендету талаптарын бұзып, адамға немесе мүлікке зиян келтірген иесі шығынды өтеуге міндеттеледі.
-
Егер жануар адам денсаулығына ауыр зиян келтірсе, оған эвтаназия жасау міндетті болады.
-
Жануарларды сату және беру тек оларды есепке алған (чиптеген) жағдайда ғана жүзеге асырылады.
Сенат мәліметінше, бұл түзетулер азаматтардың қауіпсіздігі мен жануарларға ізгілікпен қарау қағидаттары арасындағы теңгерімді сақтауға бағытталған. Енді заң жобасы Мәжілісте қайта қаралатын болады.
