ҚР Парламенті Сенатының депутаттары Шәкәрім Бұқтұғұтов пен Ольга Булавкина Өскемен қаласындағы Қасым Қайсенов атындағы 27943 әскери бөлімінің қызметімен танысты. Сондай-ақ әскери қызметшілерді 15 наурызда өтетін маңызды саяси науқанға белсене қатысуға шақырды, деп хабарлайды F16.kz.
Кездесу барысында әскери бөлімдегі тәртіп, тазалық пен қауіпсіздік талаптарының сақталуы, жауынгерлерге жасалған тұрмыстық жағдайлар назардан тыс қалмады.
Сенаторлар алдымен спорт кешенін аралап, әскери қызметшілердің дене дайындығына арналған мүмкіндіктермен, оқу-жаттығу кешенінде сарбаздардың жауынгерлік және тактикалық дайындық барысымен танысты. Оқу сабақтарының ұйымдастырылуы, заманауи құрал-жабдықтардың қолданылуы және жеке құрамның кәсіби машығын жоғары бағалады.
Жеке құраммен жүздескен депутаттар алдағы референдумның маңызына тоқталып, жаңа Конституция жобасын талқылады.
Референдумға қатысты түсіндіру жұмыстары да өте мазмұнды өтті. Ел болашағына қатысты маңызды мәселелер жөнінде ақпарат алдық. Мұндай кездесулер әскери қызметшілердің азаматтық ұстанымын нығайтып, жауапкершілігін арттыруға септігін тигізеді, — деді 27943 әскери бөлім командирінің тәрбие және идеологиялық жұмыстар жөніндегі орынбасары, подполковник Нұрлан Кисенов.
Іс-шара соңында сенаторлар әскери қызметшілердің ел қауіпсіздігін қамтамасыз етудегі жауапты қызметіне табыс тілеп, ризашылық білдірді.
