Шекара маңындағы Марқакөл ауданының бірқатар елді мекенінде ұялы байланыс пен интернет желісі іске қосылды, деп хабарлайды F16.kz.
Бұл игілікті іс 2023 жылғы 27 қазанда Президент тапсырмасына сәйкес бекітілген «Қолжетімді интернет» ұлттық бағдарламасы аясында жүзеге асырылғанын айта кету керек.
Естеріңізге сала кетсек, биылғы 26 ақпан мен 1 наурыз аралығында Шығыс Қазақстан облысының Марқакөл ауданында телекоммуникация саласының қазіргі жағдайы мен байланыс қызметінің сапасына мониторинг жүргізілді. Байланыс операторларымен бірге атқарылған жұмыс нәтижесінде бірнеше ауылда телекоммуникациялық инфрақұрылым айтарлықтай жақсарды. Атап айтқанда, «Кар-Тел» операторы өз қаражаты есебінен Игілік ауылында антенна-мачталық құрылым орнатып, электр желілерін тартып, жергілікті тұрғындарды сапалы мобильді интернетпен және байланыспен қамтамасыз етті.
Сонымен қатар қол жеткізілген келісімдер аясында ауданның тағы үш ауылында 4G байланысы іске қосылды. Бұл шаралар ауыл халқының заманауи телекоммуникациялық қызметтерге қол жеткізуін кеңейту және цифрлық теңсіздікті азайту жолындағы маңызды қадам болды.
Кеңжолақты интернетке қосылу байланыс операторы мен облыс әкімдігінің бірлескен жұмысы арқасында қамтамасыз етілді. Жобаның негізгі мақсаты – шалғайдағы ауыл тұрғындары үшін цифрлық теңсіздікті азайту және заманауи телекоммуникациялық қызметтерге қол жеткізу мүмкіндігін арттыру.
