Тәуелсіздік мерекесіне орай Шығыс Қазақстан облысының Сарыөлең ауылында жаңа мектеп ашылды, деп хабарлайды F16.kz.
Салтанатты шараға білім саласының басшылары, мәслихат депутаттары, ұстаздар қауымы және осы ерекше күнді асыға күткен жергілікті тұрғындар қатысты. Қонақтар жаңа білім ордасының ғимаратымен танысып, материалдық-техникалық базасын көрді, оқушылармен еркін форматта жүздесті.
Сондай-ақ мереке аясында мектеп жанындағы балабақша тәрбиеленушілеріне арнайы сыйлықтар табысталып, бүлдіршіндерге көтеріңкі көңіл күй сыйлады. Заманауи талаптарға сай салынған мектеп ауыл балалары үшін қолайлы әрі қауіпсіз білім беру ортасын қалыптастырып отыр.
Салтанатты жиында сөз сөйлеген облыс әкімінің орынбасары Ербол Нұрғалиев ауыл халқының өмірінде жаңа мектептің алар орны ерекше екенін атап өтіп, әлеуметтік нысанның маңызына тоқталды.
Бұл мектеп – ауылдың әлеуметтік дамуына серпін беретін маңызды нысан. Қысқа мерзім ішінде, небары сегіз айда бой көтерген білім ордасы – мемлекет тарапынан білім саласына көрсетіліп отырған нақты қолдаудың нәтижесі. Мұнда оқитын балаларға сапалы білім алып, өз әлеуетін толық ашуға барлық мүмкіндік жасалған, – деді ол.
Айта кету керек, мектеп құрылысы биылғы сәуірде басталған, бүгінде міне барлық жұмыс аяқталып, пайдалануға берілді. Бұл – жоспарлы жұмыстың, жүйелі бақылаудың және нақты нәтижеге бағытталған еңбектің айқын көрінісі.
Жаңа мектеп – ауылдың келешегіне, жас ұрпақтың сапалы білім алуына жасалған маңызды инвестиция. Тарбағатай ауданында білім саласын дамытуға бағытталған жұмыстар алдағы уақытта да жалғасын табады.
