Марқакөл ауданы Игілік ауылының тұрғындары қос қуанышты қатар тойлап жатыр. Шекара түбіндегі шағын елді мекенде Республика күніне орай 50 орындық жаңа мектеп ашылды, деп хабарлайды F16.kz.
Бұл – ауыл тұрғындары үшін зор қуаныш әрі ұрпақ болашағына бағытталған игі бастама. Заманауи үлгіде жабдықталған білім ордасы оқушыларға сапалы білім мен саналы тәрбие беруге кең мүмкіндік туғызады.
Мемлекет басшысы Қасым-Жомарт Тоқаев: «Біз елімізді білімді, көзі ашық, көкірегі ояу азаматтармен ғана дамыта аламыз» деп, ұлт болашағы – жастардың саналы тәрбиесі мен сапалы біліміне тікелей байланысты екенін баса атап өткен болатын. Білім – ел дамуының тірегі, тәрбие – рухани кемелдіктің негізі. Жас ұрпақтың сапалы білім алуына жағдай жасау – мемлекет алдындағы басты міндеттердің бірі, – деді білім ордасының ашылуы салтанатында сөз сөйлеген аудан әкімі Рүстембек Кемешов.
Жаңа оқу ордасының ашылуы ауыл балаларына туған жерден алыстамай білім алып, жан-жақты дамуға мүмкіндік береді. Бұл – ел ертеңіне жасалған маңызды инвестиция.
