Катонарағай аудандық ауруханасына ҚРФ-112 «ФЛЮКАР» жылжымалы цифрлық рентген кешені әкелінді. Оның құны – 73 млн теңге, деп хабарлайды F16.kz.
Заманауи талаптарға сай жасалған жылжымалы кешен шалғай ауылдарға барып өкпе дертін, соның ішінде туберкулез және тыныс алу жүйесінің басқа да ауруларын ерте кезеңде анықтауға мүмкіндік береді.
Жаңа флюорографиялық кешен цифрлық форматта жоғары сапалы кескін түсіре алады. Бұл дәрігерлерге диагнозды нақты қоюға, тексеру нәтижелерін жедел талдауға және пациенттердің уақытын үнемдеуге көмектеседі Сонымен қатар құрылғы сәулелік жүктемені азайтады, бұл тұрғындардың денсаулығына зиянсыз, – деді аудандық аурухананың бас дәрігері Гүлмира Сәкенова.
Жылжымалы кешеннің іске қосылуы профилактикалық тексерулердің сапасын арттырып, медициналық қызметке тұрғындардың еркін қол жеткізуін кеңейтуге, скринингтік тексерулерді көбейтуге және адамдардың денсаулығын нығайтуға оң әсерін тигізеді.
