Шығыс Қазақстан облысының Тұғыл ауылында өзен порты салынады. Бұл жағымды жаңалықты аймақ басшысы Нұрымбет Сақтағанов бүгін өткен облыстық мәслихаттың кезекті сессиясында мәлім етті, деп хабарлайды F16.kz.
Өңірде жүзеге асырылып жатқан жол-көлік инфрақұрылымын жаңғырту жұмыстары туралы баяндаған облыс әкімі биыл Шығыс Қазақстанда жалпы ұзындығы 308 шақырым жолды қалпына келтіру жоспарланып отырғанын атап өтті. Сонымен қатар шекарадағы Тарбағатай ауданында өзен порты мен теміржол желісінің құрылысы басталатынын жеткізді.
Алдағы уақытта ірі логистикалық жобаны жүзеге асыру қарастырылып жатыр. Атап айтқанда, Тұғыл ауылында өзен портын және ұзындығы 99 шақырым болатын Тұғыл-Майқапшағай теміржол желісін салу. Бұл жобалар іске асырылса өңірдің дамуына қосымша серпін береді, – деді Нұрымбет Сақтағанов.
Сонымен қатар аймақ басшысы тағы бірнеше ірі инфрақұрылымдық жоба іске асырылып жатқанын айтты. Оның ішінде Өскемендегі Сәтбаев және Есенберлин даңғылдарын, Жібек жолы мен Базовая көшелерін байланыстыратын екі деңгейлі жолайырық салу, Күршім ауылындағы айналма жол құрылысы, Глубокое ауданының Бобровка ауылындағы инфрақұрылымды жаңғырту жобалары бар.
