Катонқарағай мен Марқакөл аудандарының арасын жалғайтын Ескі Австрия жолын Шығыс Қазақстан облыстық жолаушылар көлігі және автомобиль жолдары басқармасы 25 жылға жалға алды. Ондағы мақсат – жолдың инфрақұрылымын қалпына келтіру, сапасын жақсарту, деп хабарлайды F16.kz.
Ескі туристік жол ерекше қорғауға алынған табиғи аумақ — Марқакөл мемлекеттік қорығы мен Катонқарағай ұлттық паркі арқылы өтеді. Ұзындығы шамамен 50 шақырым және бұралаңы көп қауіпті учаскелерден тұрады.
Аталған жолдың инфрақұрылымын қалпына келтіру мақсатында ШҚО жолаушылар көлігі және автомобиль жолдары басқармасы 25 жылға жалға алу туралы келісім жасасты.
Ескі Австрия жолының қазіргі жағдайын бағалау үшін арнайы комиссия құрылып, оның құрамына Катонқарағай ұлттық паркі, Марқакөл қорығы және «ОблШығысЖол» ЖШС өкілдері енді. Олар жол бойындағы барлық техникалық ақауларды тексеріп, бірінші кезекте қолға алынатын міндеттерді айқындады, – деді ШҚО жолаушылар көлігі және автомобиль жолдарды басқармасы басшысының орынбасары Нұрбек Тұраров.
Алғашқы кезеңде Катонқарағай ауданынан кіреберістегі көпірді және су өткізу жүйелерін қалпына келтіру көзделіп отыр. Аталған жұмыстардың жалпы құны – 537 миллион теңге шамасында.
Басқарманың мәліметінше, жөндеу жұмыстары таяуда басталмақ. Жолдың осы бөлігінде құрылыс-монтаждау жұмыстарына «ОблШығысЖол» ЖШС-ның мамандандырылған бригадасы тартылған.
