Ауыл кәсіпкерлеріне мемлекеттен қандай көмек-қолдау көрсетіледі? Бизнеске арналған жеңілдікті несиені қалай алуға болады? Ауыл шаруашылығы жерлерін иелену және пайдаланудың жөн-жосығы қалай? Осы және өзге сұрақтарды қарапайым халық Күршім ауданында өткен көшпелі қоғамдық қабылдауда қойды, деп хабарлайды F16.kz.
AMANAT партиясы Шығыс Қазақстан облыстық филиалының ұйымдастыруымен шалғайдағы Күршім ауданында көшпелі қоғамдық қабылдау өтті. Оған AMANAT партиясы республикалық қоғамдық қабылдау бөлмесі меңгерушісінің орынбасары Ермұхамед Жұмабек пен консультант Сағындық Жылқыбаев, ШҚО мәслихатының депутаты Ғани Шаймарданов, Күршім ауданының әкімі Мейіржан Әлбеков қатысты.
Қоғамдық қабылдау барысында аудан тұрғындары негізінен «Ауыл аманаты» жобасы аясында 2,5 пайызбен берілетін жеңілдетілген несиеге қатысты сауалдарын қойды.
Сонымен қатар ауыл шаруашылығы мақсатында пайдаланылатын жерлерді бөлу мен тиімді игеру мәселелері де көтерілді.
Шалғайдағы ауылда кәсіппен айналысу оңай емес. Қаржыға, жерге қатысты мәселелер жиі туындайды. Осындай қоғамдық қабылдаулар біз үшін үлкен көмек. Партия тарапынан көрсетіліп жатқан қолдаудың арқасында ауылдағы кәсіпті дамытуға мүмкіндік бар екенін сезінеміз, – деді жергілікті тұрғын Дәулетқан Тоқтаубаев
Көшпелі қоғамдық қабылдау енді Марқакөл ауданында жалғасады. Партия өкілдері марқакөлдіктердің сұрақтарын тыңдап, оларды жеке мәселесі бойынша қабылдайды.
AMANAT партиясы әрқашан халықпен бірге. Әсіресе, шекаралық аудандардың жағдайы біз үшін өте маңызды. Бүгін көтерілген мәселелер назарға алынып, жауапты мемлекеттік органдарға жеткізіледі. Халықтың өтініш-тілегін орындау – біздің басты міндет. «Ауыл аманаты» жобасы ауыл тұрғындарының табысын арттыруға нақты мүмкіндік береді. Біз әр азаматтың осы мүмкіндікті пайдалануына қолдау көрсетеміз, – деді Ермұхамед Жұмабек.
