Шекара шебінде орналасқан Шемонаиха ауданында жалғыз қазақ мектебі бар. Ахмет Байтұрсынұлы атындағы №5 білім ордасы 2024 жылы тірек мектептер тізіміне енгізіліп, былтыр еліміздегі үздік жүз білім мекемесінің бірі атанған, деп хабарлайды F16.kz.
«Қазақстан халқына» қорының қолдауымен білім ордасындағы барлық пәндік кабинеттер толықтай жаңартылып, заманауи құрал-жабдықтармен жабдықталған. Соның нәтижесінде балалардың ғылымға, роботатехникаға талпынысы артып, жоғары нәтижелер көрсетіп келеді.
Бұл оқу орны бұрынғы облыс әкімі Бердібек Сапарбаевтың бастамасымен 2013 жылы интернатпен бірге пайдалануға берілген. Алғашында интернат 100 орынға есептеліп, 60-тан астам бала тәрбиеленді. Қазіргі таңда көші-қон үдерістеріне байланысты интернаттағы балалар саны азайған. Дегенмен, мектебіміздің «Тірек мектептер» жобасына енуі білім сапасын арттыруға үлкен серпін берді. Бұл тек материалдық базаның жаңаруымен ғана шектелмей, мұғалімдердің кәсіби дамуына да жол ашты. Біз халықаралық және ұлттық жобаларға белсенді қатысып келеміз, – дейді мектеп директоры Салтанат Серікқызы.
Толықтай жабдықталған білім ордасында жаңашылдыққа бет бұрып, жалындап тұрған оқушы көп. Түрлі тақырыптарда ғылыми жобаларды қолға алып, үздік атанып жүргендер де бар.
Химия кабениетіне кірген бойда 9-сынып оқушылары Саянұр Амангелді мен Еркеназ Ерсайнованың ерекше жобасымен таныс болдық. Жас ғалымдар «Цитрусты жемістерден эфир майын алу» жобасын қолға алған. Яғни, арнайы құрылғы арқылы цитрусты жемістердің қабығын буландырып, химиялық тоңазытқыш арқылы конденцатқа айналып, воронка арқылы май бөлінеді. Одан оқушылар мен жетекшісі хош иісті балауыз шамдар мен әтір жасап шыққан.
Ал робототехника кабинетінде жас өнертапқыштар «Ақылды көзілдірік» жобасын таныстырды. Ол мүмкіндігі шеутеулі жандарға мүмкіндік сыйлап, қауіпсіздігін қамтамасыз етуге бағытталған. Көзілдірік қауіп сигналы арқылы және дірілі арқылы алдағы кедергіні ескертеді.
Көптеген жобалардың арасынан «Эко уәде» деген экологиялық бұрышқа еріксіз назарымыз бұрылды. Өйткені қазір өңірдегі экологиялық жағдайдың өзекті екені әмбеге аян. Оқушылар «Ғаламшарымызды бірге сақтайық» деген макет арқылы барлығын көрсетуге тырысқан.
«Эко уәде» жобасының мақсаты табиғатты аялау, суды үнемдеу, жерді таза ұстау. Біз осы экологиялық бұрыш арқылы қоқыс тастау мәдениетін қалыптастыруды, энергия көзін, табиғат байлығын тиімді пайдалануды насихаттағымыз келді, – деп түсіндірді жоба авторлары.
Бұдан өзге де сан түрлі жобаларды оқушылар қолға алған. Бірі работотехниканы, бірі өсімдік әлемін зерттеуді, енді бірі студияда жұмыс істесе, енді бірі «Көлеңке театры» арқылы өз мақсатына жетуді көздеген.
Міне осылай, өткен жылы ғана Оқу-ағарту министрінің атынан марапатталып, үздік жүз мектептің қатарына кірген оқу ошағы әлі талай белесті бағындыруды мақсат еткен.
