Суретші Александр Поповтың 100 жылдық мерейтойына орай Шемонаиха қаласында «Дәуір эскизі» атты көрме ұйымдастырылды. Сондай-ақ экспозиция қала тарихындағы маңызды даталар: елді мекеннің негізі қаланғанына 260 жыл және қала мәртебесінің берілгеніне 65 жыл толуына арналды, деп хабарлайды F16.kz порталы облыс әкімінің баспасөз қызметіне сілтеме жасап.
Александр Гаврилович Попов Шемонаиха ауданының Выдриха ауылында дүниеге келген. Ол бала кезінен сурет салуға қызығып, кейін Н.Гоголь атындағы Алматы көркемсурет училищесінде кәсіби білім алды. Жас суретшіге белгілі шеберлер — Абрам Черкасский мен Борис Иогансон ұстаздық етті.
1950-жылдардың басынан бастап Александр Попов Шемонаихада тұрды, сол жерде еңбек етті. Ол мектепте сурет салу және сызу пәндерінен сабақ беріп, табиғат аясында шығармашылықпен айналысты. Суретші портрет, пейзаж және тұрмыстық жанрдағы көптеген туынды салды. Бүгінде оның еңбектері қаланың және жергілікті тұрғындардың көркем шежіресі ретінде бағаланады.
Көрменің ашылу салтанатында сөз сөйлегендер Александр Поповтың тек талантты суретші ғана емес, кең жүректі, парасатты азамат болғанын атап өтті. Оның шығармашылығы бүгінде жерлестерінің зор мақтанышына айналды.
