Шығыс Қазақстан облысының Шемонаиха қаласында Жастар күніне орай UBA OpenFest арт-фестивалі өтті. Фестивальді жастар ресурстық орталығы мен аудандық мәдениет үйінің мамандары ұйымдастырды, деп хабарлайды F16.kz.
Талантты жастардың басын қосқан тағылымды кеште қонақтар қолөнер шеберлерінің туындылары қойылған көрмені тамашалады. Онда Владимир Истягин, Дарья Акулова қатарлы жергілікті қолөнершілердің қолынан шыққан бірегей туындылары көпшілік назарына ұсынылды. Әсіресе, ағаштан ойып жасаған мультфильм кейіпкерлерінің бейнесі, түрлі кәдесыйлар мен мүсіншелерге қызықпаған адам болмады.
Жиылған жұртшылықтың қызу қошеметіне бөленген жас дарындардың өнері көпшілікке естен кетпес әсер сыйлады. Шемонаиха ауданының әр ауылдық округінен келген өнерпаздар мерекенің көрігін қыздырып, сәнін келтірді.
Фестивальға қатысушылар мен қонақтарға арнап қызықты конкурстар ұйымдастырылды, жеімпаздарға бағалы сыйлықтар берілді.
Мерекелік кештің шарықтау шегі қалада алғаш рет өткізілген көбік би кеші болды. Бұл ерекше форматтағы іс-шара барлық қатысушыларға көтеріңкі көңіл-күй мен ұмытылмас эмоция сыйлады.
