Жылыту маусымы басталғалы өңір құтқарушылары 32 мыңнан астам үй аралап, 12-нан астам бұзушылық анықталды, деп хабарлайды F16.kz.
Тұрғындарға пеш жағу мен электр құрылғыларын пайдалану кезіндегі өрт қауіпсіздігі ережелері жан-жақты түсіндіріліп жатыр. Десе де, қауіпсіздік талаптарын бұзғандар саны әлі де азаймай тұр.
ШҚО ТЖД құтқарушыларының айтуынша, дер кезінде тазаланбаған мұржалар, зақымданған немесе тозығы жеткен электр құралдарын пайдалану, ұшқын шығаратын розеткалар жиі кездеседі.
Әлеуметтік осал отбасыларды бірінші кезекте қараймыз. Өрт шығу қаупі жоғары және көміртегі тотығымен улану қаупі бар үйлерге арнайы датчиктер орнатылды, — дейді ШҚО ТЖД баспасөз қызметі.
Профилактикалық акция аясында полициямен бірлесіп тиісті жұмыстар атқарылады. Себебі қызыл жалыннан зардап шеккендер қатарында спирттік ішімдікке және темекіге әуес адамдар жиі кездесетін көрінеді.
Қазір анықталған жағдайларды жою бойынша жұмыс жүргізіп жатырмыз. Өрттердің алдын алу және көміртегі тотығынан улану жағдайларын болдырмау үшін көп балалы және аз қамтылған отбасылардың үйлерінде пештерді жөндейміз, қарт адамдарға мұржаларын тазалауға көмектесеміз, көміртегі тотығы датчиктерін орнатамыз, – деді ШҚО ТЖД Мемлекеттік өрт бақылау басқармасының бастығы Нұржан Өміржанов.
«Қауіпсіз үй» акциясы өрттің алдын алуға бағытталған кешенді шараларды жүзеге асыруды, ұйымдар мен қызметтерді біріктіруді көздейді.
