Шығыс Қазақстан облысы әкімдігінде Қазақстан Республикасының жаңа Конституциясының жобасын талқылау және түсіндіру жөніндегі актив отырысы өтті, деп хабарлайды F16.kz.
Жиын барысында аймақ басшысы Нұрымбет Сақтағанов Ата Заңға өзгерістер енгізу – мемлекет негізіне және қоғамдық келісімге тікелей қатысты маңызды мәселе екенін атап өтті.
Айта кетейік, ұсынылған құжат кіріспеден, 11 бөлім мен 95 баптан тұрады. Комиссия түсіндірмесіне сәйкес, жоба қолданыстағы Негізгі заңды айтарлықтай жаңартуды көздейді және мазмұны жағынан жаңа Конституция қабылдауға тең.
Жиын жабық әрі тар шеңберде емес, ашық және жария форматта өтті. Жаңа Конституция жобаның преамбуласында адам құқықтары мен бостандықтары мемлекеттің негізгі басымдығы ретінде белгіленген. Бірлік пен ынтымақтастық, ұлтаралық және дінаралық келісім Қазақстан мемлекеттілігінің іргетасы ретінде айқындалады. Заң мен тәртіп, әділеттілік пен табиғатқа ұқыпты қарау қағидаты да алғаш рет Конституция деңгейінде бекітілмек, — деді ШҚО әкімі.
Президент жарлығымен Конституциялық реформа жөніндегі комиссия құрылып, құрамына 130 адам кірді. Оның қатарында Шығыс Қазақстан облысынан мәслихат төрағасы Денис Рыпаков пен Қоғамдық кеңес төрағасы Аяужан Әшімова да бар.
Комиссия мүшелерінің көбі әлеуметтік желіде белсенді. Соның нәтижесінде бүгінде желі арқылы түрлі ұсыныс-пікірлерді естіп, мұқият зерделеп, талқылап отырмыз. Осылайша комиссия жұмысы ашық және жария түрде жүзеге асырылып жатыр. 77 бапқа түзету енгізілді. Бұл Конституция мәтінінің 84 пайызын құрап отыр. Назар аударсақ, ескі Конституция – өткен дәуірдің мұрасы. Ең алдымен қолданыстағы Конституция өзінің логикасы мен рухы жағынан көп жағдайда Кеңес заманының сипатын сақтап қалған. Жаңа Конституция жобасы өткеннің қисынынан шығып, посткеңестік кеңістіктен тыс, заманауи мемлекет моделіне көшуге жасалған талпыныс деп білеміз, — деді Аяужан Әшімова.
Отырыс барысында аға буын өкілдері мен жастар да өз пікірімен бөлісіп, жаңа Конституциясының жобасын қолдайтындықтарын жеткізді.
