Астанада алғаш рет өтіп жатқан семсерлесуден Әлем кубогы кезеңінде күміс жүлде иеленген шығысқазақстандық Руслан Курбановты ШҚО әкімі Нұрымбет Сақтағанов құттықтады. Бұл туралы аймақ басшысы әлеуметтік желідегі парақшасында жазды, деп хабарлайды F16.kz.
Руслан Курбанов өзінің әлемдегі үздік семсерлесушілердің бірі екенін тағы бір мәрте дәлелдеді. Бұған дейін біз оның Германияның Хайденхайм қаласында өткен Әлем кубогындағы жеңісіне куә болған едік. Русланды, оның жаттықтырушысын және жанкүйер болған туған-туыстары мен жақындарын шын жүректен құттықтаймын! Спортшымыз осы қарқыннан таймасын! – деп жазды Нұрымбет Сақтағанов.
Естеріңізге сала кетсек, Астана төрінде жалауы желбіреген дүбірлі додада әлемнің түкпір-түкпірінен жиналған 277 семсерлесуші сынға түсіп жатыр. Кіл мықтылар арасынан Шығыстың тумасы Руслан Курбанов үздік атанып, күміс медаль еншілеуі өңір спортының өрге басып келе жатқанын көрсетеді.
