Бүгін жұмыс сапарымен Алтай ауданына жүрген Шығыс Қазақстан облысының әкімі Нұрымбет Сақтағанов жергілікті тұрғындармен кездесуде жыл басынан бері атқарылып жатқан жұмыстар туралы баяндады, деп хабарлайды F16.kz.
Аудан аумағында биыл 28 шақырым жол мен көшелер орташа жөндеуден өтті. Алтай қаласының батыс бөлігіндегі су құбыры желілерін қайта жаңғырту жұмыстары басталды. Сонымен қатар жергілікті бюджет есебінен су құбыры мен кәріз желілерін ағымдағы жөндеу жұмыстары аяқталды, — деді аймақ басшысы.
Ауданда бес жылу қазандығы бар. Орталықтандырылған жылумен 2 жарым мыңға жуық нысан қамтылған. Биыл жылу көздерін ағымдағы жөндеу жұмыстары аяқталды. Жаңа Бұқтырма кентінде жалпы құны 9,2 млрд теңгеге аулаішілік жылу желілерін қайта құру жұмыстары жалғасып жатыр.
Алтайдағы халықтың 97,2%-ы интернетпен қамтылған. Айта кетейік, 2 мыңнан астам адам тұратын 17 елді мекенде байланыстың болмауына немесе сапасыздығына қатысты арыз-шағымдар түскен.
Быково ауылында бюджет қаражаты есебінен 30 қыркүйекте антенна-мачталық діңгектің құрылысы аяқталды. 20 желтоқсанға дейін мобильді интернет қызметін көрсету үшін қажетті жабдықтарды қосу жұмыстары жүргізіліп жатыр. Қалған ауылдар «Қолжетімді интернет» ұлттық жобасы аясында 2027 жылға дейін кезең-кезеңімен қосылады. Бұдан бөлек аудандағы 23 мектепті жоғары жылдамдықты интернетпен қамтамасыз ету мақсатында Starlink жиынтықтары орнатылды, — деді Нұрымбет Сақтағанов.
