Шығыс Қазақстан облысының әкімі Нұрымбет Сақтағанов республикалық «Алтайым – алтын бесігім» атты командалық айтыста жеңіске жеткен ақындары мен дәстүрлі өнер майталмандарын қабылдады, деп хабарлайды F16.kz порталы облыс әкімінің баспасөз қызметіне сілтеме жасап.
Жуырда Өскеменде өткен айтыста Шығыстың командасы қарағандылық қарсыластарынан басым түсіп, келесі кезеңге жолдама алған болатын. Аймақ басшысы өнерпаздардың бұл жетістігін жоғары бағалап, айтыстың ұлттық мәдениеттегі орнына тоқталды.
Айтыс — қазақтың ақсүйек өнері, рухани қазынасы. Командалық айтыста абыроймен өнер көрсетіп, елдің ыстық ықыласына, шынайы қошеметіне бөлендіңіздер. Ерекше форматтағы жобаға тыңғылықты дайындықпен келгендеріңізді паш еттіңіздер. Енді келесі кезеңде де жемісті өнер көрсетулеріңізге тілектеспін!, — деді ШҚО әкімі.
Өңір басшысы облыста ұлттық өнер мен мәдениетті дамытуға ерекше назар аударылып жатқанын атап өтті.
«Театр көбейсе, түрме азаяды» деген сөз бар. Өнерге бет бұрған адам жамандықтан тыйылады. Сондықтан бұл бағыттағы жұмысты күшейте береміз, — деді Нұрымбет Сақтағанов.
Кездесу барысында Шығыс Қазақстан командасының жетекшісі, белгілі айтыскер ақын Серік Құсанбаев облыс әкіміне қолдау көрсеткені үшін алғыс білдірді.
Келесі кезеңге дайындықты бастап кеттік. Сенім білдіріп, қолдау көрсеткеніңіз үшін рақмет. Үмітті ақтауға тырысамыз, – деді ол.
Айта кетейік, командалық айтыс жобасы 2024 жылдан бері Amanat партиясының бастамасымен жүзеге асырылып келеді. Жобаның авторы – Мәжіліс депутаты Аманжол Әлтай. Ал қазылар алқасына айтыс өнерінің ақсақалы, Қазақстанның еңбек сіңірген қайраткері Жүрсін Ерман жетекшілік етеді.
