Халықаралық жастар күнінде Шығыс Қазақстан облысының белсенді жастары Жамбыл Жабаев атындағы саябаққа жиналды. Ондағы мақсат — аймақ басшысымен ашық әңгіме өрбітіп, өз ұсыныстарын жеткізу, деп хабарлайды F16.kz.
Түрлі салада жетістікке жетіп, өңірдің дамуына үлес қосып жүрген жас буын облыс әкімі Нұрымбет Сақтағановпен ашық аспан астында ерекше кездесу ұйымдастырды.
Кездесу барысында саяхатшы-блогер Вячеслав Орлов табиғатқа жанашырлық пен жастардың «Таза Қазақстан» бастамасына қатысуы туралы айтты. Ал, волонтер Әнел Шәріпжанова еріктілер қозғалысындағы тәжірибесімен бөлісті.
Сонымен қатар кітаптар, жасанды интеллект, заманауи кітапханалар, экология, туризм, шығармашылық және жастардың өз идеяларын туған жерінде жүзеге асыру мүмкіндіктері туралы сөз болды.
Өңірімізде жастарға қолдау көрсетіліп келеді. Ойын айын айтып, ұсыныстарын білдіруге мүмкіндік көп. Енді алдағы уақытта баспана алу үшін жастарға жеңілдетілген бағдарламалар болса деген ұсынысым бар, — деп атап өтті блогер Сымбат Рамазанов.
Кездесу барысында Нұрымбет Сақтағанов бүгінде өңірде 170 000 жас тұратынын атап өтіп, олардың әрқайсысы білім, спорт, бизнес, шығармашылық немесе қоғамдық қызметте өз орнын табуы маңызды екенін айтты.
Жиын соңында қатысушыларға Ұлы Абайдың кітабы тарту етілді. Бұл – адамның өмірде өз орнын табу және қоғам алдындағы жауапкершілігін ой елегінен өткізудің қаншалықты маңызды екенін білдіретіндей.
Сондай-ақ облыстық Жастар ресурстық орталығына қызметтік автокөлік сертификаты табысталды.
Осылайша, кездесу өзгерісті күтпей, оны өздері жасауға атсалысып жүрген жастарды бір жерге жинап, ой-пікірлерін ортаға салуға мүмкіндік берді.
