Шығыс Қазақстан облысында тұрмыстық қалдықтарды уақтылы шығару мәселесі күн тәртібіне шықты. Облыс әкімі Нұрымбет Сақтағанов бұл бағыттағы жұмыстың әлсіз тұстарын сынға алып, нақты тапсырма жүктеді, деп хабарлайды F16.kz.
Аймақ басшысының айтуынша, Өскемен, Риддер қалалары мен Алтай, Зайсан, Шемонаиха аудандарында стихиялық қоқыс үйінділері көбейген. Әлеуметтік желілерде де контейнерлердің шамадан тыс толып, кейбір аулаларда қоқыстың бірнеше апта бойы шығарылмағаны туралы шағымдар көбейген.
Әлеуметтік желіде қоқыс контейнерлерінің шамадан тыс толып кеткені туралы деректер жиі жарияланып жатыр. Кейбір контейнерлер бірнеше апта бойы тазартылмаған. Бұл қолданыстағы контейнерлер санының жеткіліксіз екенін көрсетеді. Сондықтан нормативтерді қайта қарап, контейнерлер санын арттыру қажет, – деді облыс әкімі.
Жиында айтылған тағы бір түйткіл – халық санының нақты есепке алынбауы. Облыс әкімінің мәліметінше, азаматтардың тіркеусіз тұруы қалдықтарды шығару жүйесіне қосымша салмақ түсіріп, жоспарлау процесін қиындатқан. Осыған байланысты Нұрымбет Сақтағанов қалдықтарды басқару жүйесін жетілдірумен қатар, тұрғындар арасында түсіндіру жұмысын күшейтуді тапсырды. Сондай-ақ қоқыс шығару қызметін көрсететін компаниялармен келісімшарттарды толық реттеу қажеттігі айтылды. Тіркеусіз тұратын азаматтарға қатысты бақылауды күшейтіп, бұл іске құқық қорғау органдарын тарту мәселесі де көтерілді.
Облыс әкімі нақты мерзім белгіледі. Оның айтуынша, қала және аудан әкімдері бір апта ішінде барлық стихиялық қоқыс үйінділерін жоюға тиіс. Бұдан бөлек қоқыс шығару кестесінің қатаң сақталуы қамтамасыз етілуі керек.
Қайталанған фактілер бойынша талдау жүргізіп, айыппұл салыңыздар, қажет болса мердігерлермен шарттарды бұзыңыздар. Енді ешқандай сылтау қабылданбайды. Тәртіп орнатыңыздар!, – деді Нұрымбет Сақтағанов.
Жиын қорытындысында облыс басшылығы бұл бағыттағы бақылау күшейтілетінін және қалдықтарды басқару жүйесі тұрақты назарда болатынын атап өтті.
