Шығыс Қазақстан облысының әкімі Нұрымбет Сақтағанов өңірдің мұнай-газ саласы қызметкерлерін кәсіби мерекелерімен құттықтады, деп хабарлайды F16.kz.
Елімізде мұнайшылар мерекесі қыркүйектің алғашқы жексенбісінде атап өтіледі. Биыл бұл күн 7 қыркүйекке тұспа-тұс келді. Бірақ дәл сол кезде вахталық жұмыс кестесіне байланысты мамандарды тегіс жинау мүмкін болмағандықтан марапаттау салтанаты кейінге шегерілген.
Аймақ басшысы мұнай-газ саласы өкілдерінің еңбегін ерекше бағалап, олардың жұмысы энергетиканы дамытып, экономиканы нығайтуға, азаматтардың өмір сүру сапасын арттыруға ықпал ететінін атап өтті.
Мұнай-газ саласы мамандарының еңбегі жанкештілікті, тәртіп пен шеберлікті талап етеді. Сіздердің мамандыққа адалдықтарыңыз – өңір мен елдің тұрақтылығы мен әл-ауқатының берік негізі, – деді ол.
Облыс әкімі «QAZAQGAZ AIMAQ» облыстық филиалының ұжымына да алғыс айтты. Олар Зайсан ауданындағы он елді мекенді тұрақты түрде газбен қамтамасыз етіп келеді.
Салтанатты жиын барысында саланың үздік өкілдеріне марапаттар табысталды. Облыс әкімінің алғыс хатымен марапатталғандар:
Аслан Қуанбекұлы — жерасты газ құбырларын пайдалану және жөндеу слесары;
Серікбек Қызыр — электр газбен дәнекерлеуші;
Дулат Болатұлы Садуақасов — апаттық-қалпына келтіру жұмыстарының слесары.
KAZENERGY қауымдастығының Құрмет грамотасы газбен жабдықтау және сату қызметінің маманы Елдос Файзулинге табысталды.
«Атамекен» ұлттық кәсіпкерлер палатасының Құрмет грамотасы электрогазбен дәнекерлеуші Ерасыл Бақытханұлына берілді.
«QazaqGaz Onimderi» ЖШС Бас директорының Құрмет грамотасы кәсіпорын жүргізушісі Еркін Имановқа табысталды.
