Шығыс Қазақстан облысының әкімі Нұрымбет Сақтағанов Жаңа жыл қарсаңында Өскеменнің Ахмер елді мекенінде орналасқан отбасылық Балалар ауылына барып, кішкентай тұрғындарды келе жатқан мерекемен құттықтады, деп хабарлайды F16.kz.
Балалар ауылы 25 жылдан бері жұмыс істеп келеді. Қазір онда 65 бала тәрбиеленіп жатыр. Мұнда балалар өздерін үйінде жүргендей сезіну үшін барлық жағдай жасалған, отбасындағыдай орта қалыптастырылған, ал білім беру процесі қазақ және орыс тілдерінде жүргізіледі.
Бұл күні тәрбиеленушілер мен аймақ басшысының қатысуымен Жаңа жылға арналған мерекелік бағдарлама ұйымдастырылды. Балалар ән айтып, би билеп, театрландырылған қойылым қойды.
Облыс әкімі балаларды келе жатқан Жаңа жылмен құттықтап, оларға тәтті сыйлықтар табыстады.
Балақайлардың амандығы, қауіпсіздігі және бақытты балалық шағы үшін жағдай жасау — өңірдің әлеуметтік саясатының басымдықтарының бірі. Бұл бағыттағы жұмыстар алдағы уақытта да ерекше назарда болады, – деп атап өтті аймақ басшысы.
