Аймақ басшысы Нұрымбет Сақтағанов Тарбағатай ауданына сапарында Қабанбай ауылындағы тозығы жеткен дәрігерлік амбулаторияның жұмысымен танысты, деп хабарлайды F16.kz.
1982 жылы салынған ғимарат бүгінде штаттық режимде жұмыс істеп, Қабанбай, Тәуке, Шорға, Шеңгелді және Қазақстан ауылдарының 2009 тұрғынына, оның ішінде 642 балаға медициналық көмек көрсетіп отыр.
Қазіргі таңда мұнда 1 дәрігер мен 9 мейірбике науқастарды қабылдайды. Күрделі жөндеуге жатпайтын нысында ШҚО әкімі толық аралап шығып, оған қатысты шешім алдағы уақытта белгілі болатынын жеткізді.
Ал Қарасу ауылында 2016 жылы құрылысы жекеменшік балабақша ретінде басталған ғимарат қазір бос тұр.
Аудан әкімдігі жұмысы толық аяқталмаған нысанды мемлекет меншігіне сатып алып, дәрігерлік амбулатория ашуды ұсынды.
Бұл нысанның жағдайын жан-жақты зерттеп, құрылысты аяқтау бойынша нақты ұсыныстар енгізу қажет. Мүмкін ғимарат медициналық пункт ретінде немесе басқа да мақсатта пайдаланылуы мүмкін. Екі қабатты ғимарат ауылдық амбулатория үшін үлкен. Сондықтан ауылдағы басқа да мемлекеттік мекемелерді орналастыру жағын қарастыру керек, – деді облыс әкімі Нұрымбет Сақтағанов.
Қазір Қарасу ауылдық округінде жұмыс істеп тұрған амбулаторияның да әбден тозығы жеткен. Аудан әкімінің сөзінше, ертеректе салынған нысан денсаулық сақтау талаптарына сай келмейді.
