Шығыс Қазақстан облысының әкімі Нұрымбет Сақтағанов өңір тұрғындары мен мемлекеттік қызметкерлерді театрға жиі барып, жергілікті әртістерге қолдау көрсетуге үндеді. Бұл туралы облыс әкімдігінде өткен жиында айтылды, деп хабарлайды F16.kz.
Аймақ басшысының сөзінше, театр — тек мәдени демалыс орны емес, рухани дамудың көзі. Облыста жыл сайын 20-дан астам жаңа қойылым сахналанып, көрерменге ұсынылады. Сонымен қатар театр билеттері де қымбат емес.
Бізде жыл сайын 20-дан астам премьера өтеді. Билет бағасы қолжетімді. Өзім демалыс күндері театрға баруға тырысамын, сіздерге де соны ұсынамын. Бұл әрі демалыс, әрі мәдениет, — деді Нұрымбет Сақтағанов.
Әкім мәдени демалысты дамыту арқылы қоғамның рухани деңгейін көтеру маңызды екенін атап өтіп, мемлекеттік қызметкерлерді де театр өміріне белсенді араласуға шақырды.
Жиын барысында өңірдің әлеуметтік-экономикалық дамуына қатысты бірқатар өзекті мәселе қаралды. Атап айтқанда, Президент тапсырмаларының орындалу барысы, сондай-ақ Сәтпаев–Жібек жолы жолайрығы құрылысының жай-күйі талқыланды.
Облыс әкімі аталған инфрақұрылымдық жобаның жүзеге асу қарқынын арттыруды тапсырды.
Сонымен қатар қаржыландыру мәселелерін жеделдетіп шешу және қойылған міндеттердің орындалуын апта сайын тұрақты бақылауда ұстау қажеттігін ескертті.
Мамандардың айтуынша, мәдени бастамалар мен инфрақұрылымдық жобаларды қатар дамыту өңірдің жалпы әлеуметтік ахуалын жақсартуға ықпал етеді.
