Шығыс Қазақстан облысында жиыны 4 мыңнан астам адам тұрып жатқан ауылдарға таза ауызсу желісі тартылмаған. Облыс әкімдігі жыл соңына дейін өңір тұрғындарын сапалы ауызсумен толық қамтуды көздеп отыр, деп хабарлайды F16.kz.
Ресми мәліметке сүйенсек, қазір аймақ халқының 99,4%-ы (99,9%-ы қалада, 98,4%-ы ауылда тұрады) таза ауызсуға қол жеткізген. Көрсеткішті жүз пайызға жеткізу үшін әлі де төрт мыңнан аса адамды сумен қамту қажет. Сол үшін биыл 26 жобаға 15 млрд теңгеден астам қаржы бөлінді. Жоспар бойынша ауылдық округтер мен қалаларда су желілерін салу, қайта жаңғырту қарастырылған. Жыл соңына дейін 13 жобаны аяқтау міндеті тұр. Олар: Комсомольский, Катонқарағай, Үлкен Нарын, Отрадное, Бозанбай, Асубұлақ, Үлкен Өзен, Берёзовка елді мекендерінде ауызсу желісін іске қосу.
Қыркүйек айының басында бұл жұмыстарға бөлінген қаражаттың 92%-дан астамы игерілген. Жекелеген нысандарда сорғы станциялары мен электр желілері бойынша кідірістер бар.
Облыс әкімі Нұрымбет Сақтағанов өңір халқын таза ауызсумен қамту бағытындағы бұл жұмыстарды биылғы қазан-қараша айларында аяқтауды тапсырды.
