Шығыс Қазақстан облысында 13 сәуірден бастап ресми түрде өрт қауіпі жоғары маусым басталды. Бұл туралы өңірлік коммуникациялар қызметі алаңында өткен баспасөз мәслихатында ШҚО төтенше жағдайлар департаментінің өкілдері мәлімдеді, деп хабарлайды F16.kz.
Өрт қауіпсіздігі бойынша брифингте ШҚО ТЖД мемлекеттік өрт бақылау басқармасының бастығы Нұржан Өміржанов өңірдің табиғи ерекшелігі мен орманды алқаптың басым болуы өрт қаупін арттыра түсетінін атап өтті. Сондықтан қазір облыста өртке қарсы кешенді дайындық жұмыс толыққанды жүргізіліп жатыр.
Шығыс Қазақстанда барлығы 13 орман шаруашылығы, екі мемлекеттік табиғи қорық және бір ұлттық парк жұмыс істейді. Табиғи аумақтарды қорғау және өрттің алдын алу үшін 48 орман өрт сөндіру станциясы мен «Қазавиаорманқорғау» мекемесінің бөлімшелері жұмылдырылған.
Қазір өңірде 1329 қызметкер, 249 техника, оның ішінде 128 өрт сөндіру автокөлігі кез келген төтенше жағдайға дайын тұр. Сонымен қатар құтқару бөлімшелері қажетті құрал-жабдықтармен толық қамтамасыз етілген. Қауіп жоғары аймақтарда бақылау дрон арқылы да жүргізіледі.
Кейінгі жылдары Қазақстанда орман және дала өрттерінің бір бөлігі климаттық факторларға байланысты көбейгені байқалады. Әсіресе құрғақшылық пен аптап ыстық өрт қаупін арттыратын негізгі факторлардың бірі болып отыр.
Мамандардың мәліметінше, орман өртінің табиғи себептері де бар. Оның ішінде төтенше жағдайдың дені найзағайдан болады. Дегенмен статистикада адам факторы әлі де басты қауіп көзі ретінде қалып отыр.
Осыған байланысты ТЖД тұрғындарға өрт қаупі жоғары кезеңде бірқатар ережені есте сақтап, тыйымдарды қаперде ұстауды ескертті. Атап айтқанда, орман және далада от жағуға, темекі тұқылын тастауға, жанғыш қалдықтарды бей-берекет қалдыруға, рұқсат етілмеген жерде мангал пайдалануға қатаң тыйым салынған. Сонымен қатар шөп өртеуге мүлде рұқсат жоқ.
Қоқыс өртеу тек арнайы талаптарды сақтаған жағдайда рұқсат етіледі: желсіз ауа райында, ғимараттан алыс жерде жүзеге асырылуға тиіс. Мұндай жұмыстар кезінде өрт сөндіру құралдарының (су, құм, өрт сөндіргіш) болуы міндетті.
Статистикалық деректер көрсеткендей, ауылды жерлердегі өрттің едәуір бөлігі тұрмыстық қоқысты бақылаусыз жағу салдарынан туындайды.
Сонымен қатар «Таза Қазақстан» экологиялық акциясы аясында өтетін сенбілік кезінде де қауіпсіздік талаптарын сақтау ерекше маңызды. Мамандар жиналған қоқысты тек арнайы белгіленген, құрғақ және қауіпсіз аумақта өртеуді, тұрғын үйлерден кемінде 50 метр қашықтықты сақтауды ескертеді.
Өрт сөндіру қызметі отты қараусыз қалдыруға, балалардың отпен ойнауына жол бермеуге және құрғақ шөп пен жапырақты бей-берекет өртеуге болмайтынын еске салды.
Өрт қауіпсіздігі талаптарын бұзу әкімшілік жауапқа тартумен ғана шектелмейді, кей жағдайда кінәлі адам қылмыстық жазаға тартылуы да мүмкін, — деді Нұржан Өміржанов.
ШҚО ТЖД тұрғындарды табиғатқа ұқыпты қарап, қауіпсіздік ережелерін қатаң сақтауға және өрттің алдын алуға бағытталған шараларға жауаптылықпен қарауға шақырады.
