Шығыс Қазақстан облысында сүт өндірісі тұрақты дамып келеді. Өңірде жұмыс істеп тұрған сүт өңдеу кәсіпорындарының өндірістік қуаты ұлғайып, жаңа инвестициялық жобалар қолға алынған. Бұл туралы әкімдік отырысында ШҚО ауыл шаруашылығы басқармасының басшысы Ажар Қаджибекова айтты, деп хабарлайды F16.kz.
Қазір облыста 13 сүт өңдеу кәсіпорны жұмыс істеп тұр. Олардың жиынтық жылдық қуаттылығы 207 160 тоннаны құраса, жүктеме деңгейі 62 пайызға жеткен.
Былтырғы жылдың қорытындысы бойынша өңір кәсіпорындары 129 мың тонна сүт өңдеген. Бұл өткен жылдың сәйкес кезеңімен салыстырғанда 28 пайызға артық. Саланы одан әрі дамыту мақсатында Қазақстан Республикасы Үкіметінің 2026 жылғы 29 қаңтардағы №51 қаулысымен Мал шаруашылығын дамытудың 2026–2030 жылдарға арналған кешенді жоспары бекітілді. Құжатта мал басын көбейту және мал шаруашылығы өнімдерінің өндіріс көлемін арттыру бойынша нақты міндеттер белгіленген, — дейді басқарма басшысы.
Жоспарға сәйкес, 2030 жылға қарай ірі қара мал басын 53 пайызға арттыру, сүт өндіру көлемін 36 пайызға ұлғайту көзделген. Ал биыл облыстағы ірі қара мал саны 369 мың бастан 387 мың басқа дейін өсуге тиіс.
Сүтті мал шаруашылығын дамыту үшін мемлекет тарапынан ауқымды қолдау көрсетілуде. Атап айтқанда, асыл тұқымды мал шаруашылығын дамытуға, өнімнің сапасы мен өнімділігін арттыруға субсидиялар бөлінеді. Бұдан бөлек, агроөнеркәсіптік кешен субъектілерінің лизингтері мен несиелері бойынша сыйақы мөлшерлемелері субсидияланады. Қайта өңдеу кәсіпорындарының ауыл шаруашылығы өнімдерін терең өңдеу үшін сатып алу шығындарының бір бөлігі өтеледі. Инвестициялық жобаларды іске асыру барысында жұмсалған шығындардың белгілі бір үлесі мемлекет тарапынан субсидияланады, — деп атап өтті Ажар Қаджибекова.
Сондай-ақ агроөнеркәсіптік кешен саласындағы жобаларды кредиттеу, «Ауыл аманаты» бағдарламасы аясында мал шаруашылығы жобаларын қаржыландыру және сырттан әкелінетін асыл тұқымды ірі қара малды сатып алуға жылдық 6 пайызбен жеңілдетілген несие беру тетіктері қарастырылған. Бұл бағытта «Игілік» және «Береке» бағдарламалары тиімді жұмыс істеп келеді.
Облыс әкімі ауыл шаруашылығы басқармасы мен аудан, қала әкімдіктеріне сүт өндірісін арттыру және ірі қара мал басын көбейту бойынша жоспарлы көрсеткіштердің орындалуын бақылауға алуды тапсырды.
