Шығыс Қазақстанда жыл басынан бері 4471 адамды кене шаққан, оның ішінде 1238 бала бар, деп хабарлайды F16.kz.
Облыстық санитарлық-эпидемиологиялық бақылау департаментінің мәліметіне сүйенсек, бұл көрсеткіш өткен жылдың осы кезеңімен салыстырғанда 1085 жағдайға көбейген.
Бұл көрсеткіштің 2 есе өсуі жаһандық жылынумен, олардың белсенділік маусымының ұзаруымен және тіршілік ету ортасының біртіндеп кеңеюімен байланысты болып отыр. Кене шаққандардың ең көп үлесі Өскемен, Риддер қалалары мен Алтай, Катонқарағай, Глубокое, Самар, Үлкен Нарын, Шемонаиха, Зайсан және Ұлан аудандарында тіркелген, — дейді ШҚО санитарлық-эпидемиологиялық бақылау департаментініғ басшысы Қанат Тұрдиев.
Эпидемиологиялық маусымның басынан бастап облыстың 9 эндемиялық аумағында кене энцефалитінің зертханалық расталған 17 жағдай тіркелген. Оның ішінде Катонқарағай ауданында -3 жағдай, Өскемен қаласы-7, Риддер қаласы мен Алтай, Глубокое, Зайсан, Ұлан, Үлкен Нарын және Шемонаиха аудандарында бір-бір жағдайдан анықталған.
