Шығыс Қазақстан облысында 300-ге жуық жазасын өтеушінің мерзімі қысқартылып, 50-деп астам адам рақымшылыққа ілінуі мүмкін. Бұл туралы облыстық қылмыстық-атқару жүйесі департаментінің ресми өкілі Салтанат Ожиканова айтты, деп хабарлайды F16.kz.
Өңірде Қазақстан Республикасының жаңа Конституциясына байланысты қабылданған рақымшылық туралы заңды іске асыру бойынша жұмыстар жалғасып жатыр.
Бүгінгі таңда Шығыс Қазақстан облысының пробация қызметі рақымшылыққа ілігетін сотталғандарға қатысты 300-ге жуық материалды сотқа жолдады. Олардың басым бөлігі бойынша жаза мерзімін қысқарту көзделген. Сонымен қатар 50-ден астам адамды жазасын өтеуден толық босату мүмкіндігі қарастырылып жатыр. Әрбір материал заң талаптарына сәйкес жеке қаралады, ал түпкілікті шешімді сот қабылдайды, – деді Салтанат Ожиканова.
Бұл мүмкіндікті пайдаланғандар қатарында шығысқазақстандық 22 жастағы жас жігіт бар. Ол жақында сот залынан мерзімінен бұрын босатылды.
Жас жігіт сүйіктісінің өтінішімен анасына тиесілі алтын алқаны ломбардқа өткізген. Кейін бұл туралы білген әйел құқық қорғау органдарына арызданып, нәтижесінде жас жігітке қатысты қылмыстық іс қозғалды. Сот оны кінәлі деп танып, бір жылға бас бостандығын шектеу жазасын тағайындады. Үкім заңды күшіне енгеннен кейін ол екі ай бойы пробация қызметінің есебінде болды, — дейді Шығыс Қазақстан облысы бойынша Қылмыстық-атқару жүйесі департаментінің ресми өкілі.
Қазақстан Республикасы Конституциясының 30 жылдығына арналған рақымшылық туралы заң күшіне енгеннен кейін Шығыс Қазақстан облысы бойынша пробация қызметінің мамандары сотталған азаматтың жеке ісін зерделеп, рақымшылық қолдану туралы материалдарды сотқа жолдады.
Сот ұсынысты қанағаттандырып, жас жігітті сот залында одан әрі жазасын өтеуден босатты.
